Afg’oniston hukumati hibsda saqlanayotgan yuzlab Tolibon vakillarini ozodlikka chiqarishga qaror qildi. Tashabbusni Tolibon harakati ham, AQSh hukumati ham qo’llab- quvvatlamoqda. Qaror uzoq yillik qonli afg’on urushiga siyosiy yechim topish yo’lida qo’yilgan jiddiy qadam ekani aytilmoqda.
Afg’oniston Prezidenti Ashraf G’ani ikki oy mobaynida 900 ga yaqin Tolibon mahbuslarining ozod etilishini ma’lum qilgan. Rasmiylarning bildirishicha, harakatning o’nlab a’zolari allaqachon erkinlikka chiqarilgan.
Afg’oniston OAV ma’lum qilishicha, joriy haftada 300 mahbus ozod etiladi.
Tolibon harakati ham Afg’onistonning turli qamoqxonalaridan o’z vakillarining ozod etilayotganini tasdiqlagan. Ushbu qarorni “pozitiv qadam” deb baholayotgan harakat yetakchilari hukumatni jarayonlarni shu zaylda davom ettirishga chaqirmoqda.
AQShning Afg’onistondagi elchisi Joxan Bass Kobulning tashabbusini olqishlab, qaror nizolarga siyosiy yechim topishga xizmat qiladigan iqlimni yuzaga keltirishini ta’kidladi. “Barqaror tinchlik tomonlarning o’zaro murosasi va kechirimlilik hislatlari asosiga quriladi”, - deb yozdi Bass “Twitter”da.
Ayni damda, elchi Tolibon harakatini afg’on hukumati vakillarini ozod etish bilan javob bermagani uchun tanqid qilgan.
AQSh va Tolibon o’rtasidagi navbatdagi muzokara joriy oy oxirida Qatarda o’tishi kutilmoqda.
Facebook Forum