Breaking News

Xitoy ikki uyg'ur rasmiysini o'limga hukm qildi


Xitoy zulmiga qarshi namoyishga chiqqan uyg'ur. Turkiya, 25-mart, 2021.

Shinjonning ikki sobiq rasmiysi separatizm harakatida ayblanib, o’limga hukm qilindi.

Bu haqda Shinjon avtonom hududi Oliy sudi vitse-prezidenti Van Langtao ma’lum qildi. Aybdorlar Sattor Sovut va Shirzat Bavudunga belgilangan jazo ijrosi ikki yil muddatga kechiktirilgan. Odatda, bunday hollarda o’lim jazosi umrbod qamoq jazosiga o’zgartiriladi.

Ta’lim tizimi rasmiysi bo’lgan Sattor Sovut uyg’ur tilidagi maktab darsliklariga etnik separatizm, terrorizm va diniy ekstremizmga oid g’oyalarni kiritganlikda ayblangan.

Shinjon Adliya departamenti rasmiysi Shirzat Bavudun BMT terrorchi guruhlar ro’yxatiga kiritgan “Sharqiy Turkiston Islomiy harakati” bilan aloqa o’rnatganlikda ayblangan. “Qizining nikoh marosimida taqiqlangan diniy tadbirni o’tkazgan” deyiladi ayblov xulosasida.

Pekin Shinjonda yirik masshtabli “xavfsizlik kampaniyasi”ni amalga oshirmoqda. Natijada, 1 milliondan ziyod uyg’urlar va boshqa musulmon millat vakillari qamoqxonalardan aslo farq qilmaydigan “qayta tarbiyalash lagerlari”da ushlab turilibdi.

Pekinga ko’ra, lagerlar aholining radikal g’oyalardan voz kechishi, zamonaviy kasb-hunarlarni egallashi va qashshoqlikdan xalos bo’lishiga xizmat qiladi.

Biroq Vashington Pekinning iddaolarini rad etmoqda. AQSh hukumatiga ko’ra, e’tiqod va so’z erkinligini toptayotgan Pekin Shinjon aholisiga qarshi repressiyani boshlagan. Uyg’urlarga qarshi genotsid jinoyatini amalga oshirmoqda.

AQSh Davlat departamenti matbuot kotibining ma’lum qilishicha, AQSh barcha ittifoqchi mamlakatlar bilan 2022-yilda Pekinda o’tadigan Qishki olimpiada o’yinlarini boykot qilishni muhokama qiladi.

  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

Facebook Forum

XS
SM
MD
LG