Breaking News

AQShning Afg'onistondagi qo'shini teng yarmiga qisqaradimi?


Respublikachi senator Linzi Grem Pokiston hukumati bilan uchrashuvdan so'ng Amerika elchixonasida nutq so'zlamoqda. Islomobod. 20-yanvar, 2019

Yaqin orada Amerika qo’shinlarining yarmi Afg’onistondan qaytadi degan xabar noto’g'ri. Bu haqda Prezident Trampga yaqin senator bayonot berdi.

“Bunday raqamlarga doir dalilim yo’q. Xabarning to’g’riligiga ishonmayman”, - dedi senator Linzi Grem Pokistonga safari chog'ida.

“The New York Times” nashri Prezident Donald Tramp Afg’onistondan yetti mingga yaqin qo’shinni qaytarishga qaror qilganini yozgan edi. Oq uy raddiya e’lon qilmadi. “The Washington Post” gazetasiga ko'ra, sobiq Mudofaa vaziri Jim Mattis aynan Afg’oniston va Suriyadan qo’shinlarni chiqarish borasida prezident bilan kelisha olmagani sabab iste’fo bergan.

Amerika qo’shinlarining qisqarishi haqidagi xabar mintaqada bezovtalik uyg’otgan.

Shu kunlarda AQShning Afg’oniston bo’yicha maxsus elchisi Zalmay Halilzod to’rt kunlik tashrif bilan Pokistonda bo’ldi. Mezbon davlat urinishlariga qaramay, Tolibon Amerika delegatsiyasi bilan uchrashuv taklifini rad etgani haqida xabarlar bor.

Muzokaralar boshi berk ko’chaga kirib qolgan. Tolibon jarayonga Afg’oniston hukumatining jalb etilishini istamaydi. Harakat afg’on hukumatini “Amerikaning qo’g’irchog’i” deb biladi, qonuniy hukumat sifatida tan olmaydi.

Senator Linzi Grem afg’on urushiga siyosiy yechim topish lozimligini ta’kidlaydi. U nizolarga yakun yasash borasida AQSh va Pokiston rahbarlarining uchrashuvini tez fursatda o’tkazishni taklif qildi.

AQSh va Pokiston umuman bir-biriga ishonmay qo'yganiga, Grem nazarida, Islomobod Amerika bilan to’liq hamkorlik qilmayotgani sababchi.

“Pokiston bizni yanada ishonchli hamkor sifatida ko’rgan kuni samaraliroq natijaga erishadi”, - dedi u.

AQSh uzoq vaqtdan buyon Pokistonni Tolibonni qo’llab-quvvatlaganlikda ayblab keladi. Islomobod ayblovni inkor etgan. Vashingtonga ko’ra, Islomobod Tolibonni muzokara stoliga jalb qilishda asosiy vositachi bo’lishga qodir.

  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

Facebook Forum

XS
SM
MD
LG