Breaking News

Suriyada kimyoviy qurollarni kim ishlatgani tekshiriladi


Birlashgan Millatlar Tashkiloti Xavfsizlik Kengashi Suriyada xlor gazi va boshqa kimyoviy qurollarni qo'llagan guruhlarni topib jazolashga qaratilgan rezolyutsiya qabul qildi.

Bunday qurollar aholiga qarshi ishlatilganini tekshiradigan xalqaro tashkilot bor, lekin javobgarlarni aniqlash shu paytgacha bu organ vakolatiga kirmagan.

Xavfsizlik Kengashi bir ovozdan ma'qullagan rezolyutsiya doirasida yangi bir mexanizm joriy etilmoqda va ekspertlar guruhi tuziladi.

AQShning BMTdagi elchisi Samanta Pauer kengash qarorini olqishlamoqda. "Jinoyatchilarni fosh etish o'ta muhim. Tasavvur qiling, jinsiy zo'ravonlik, qiynoq va qotilliklarni tekshirishni so'ray turib, bunday vahshiyliklarni kim amalga oshirgani bilan qiziqmasak, bu qanday holat?" - deydi u.

Aytish joiz, Qo'shma Shtatlar va Rossiya Suriya mojarosini qanday hal qilish bo'yicha turlicha fikrda, ammo mamlakatdagi kimyoviy qurollarni yo'q qilish zarurligini tan olishadi.

Ikki kun ilgari AQSh Davlat kotibi Jon Kerri hamkasbi Sergey Lavrov bilan rezolyutsiya matni ustida kelishib olgan edi.

  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

XS
SM
MD
LG