Ochlik e'lon qilgan jurnalistlar prezidentdan umidini uza boshladi


Malohat Eshonqulova va Saodat Omonova



O'zbekiston davlat televideniyesida senzura, mahalliychilik va korrupsiyaga qarshi kurashib, ishidan ayrilgan ikki jurnalistning ochlik e'lon qilganiga 10 kun bo'ldi. Malohat Eshonqulova va Saodat Omonova prezident Islom Karimov diqqatini jalb etish maqsadida shunga majbur bo'ldi. Ammo mutasaddilardan haligacha javob yo'q.

Saodat Omonova avval Samarqanddagi mustaqil STV studiyasida, so'ng 1998-yildan beri "Yoshlar" telekanalida ijod qilgan. Reportajlarni tomoshabinga burro-burro yetkazar, berilib ishlardi. To'qqiz kun tuz totmaganiga qaramay Amerika Ovozi bilan dadil so'zlashishga harakat qildi.

Televideniye rahbariyatining qaroridan norozi bu ikki jurnalist ularni ishda tiklashni talab qilib, sudga murojaat etadi. Biroq ularning da'vosi qoniqtirilmaydi. Shunda sobiq muxbirlar prezident qabuliga kirishga harakat qilib ko'radi. May oyidan boshlab 26-iyungacha prezident devoniga jami 56 ta maktub yuboriladi. Undan tashqari bosh vazir, ichki ishlar vaziri, Milliy Xavfsizlik Xizmati raisi idoralariga ham ko'plab xatlar jo'natiladi.

Eng achinarlisi, deydi qizlar, Inson huquqlari bo'yicha Ombusdman Sayyora Rashidova ham ularning dardiga ko'zini yumdi.

22-iyunda, Matbuot va Ommaviy axborot vositalari xodimlari kunida Malohat Eshonqulova va Saodat Omonova ochlik e'lon qildi.

Qizlar ochlik e'lon qilganidan to'qqiz kun o'tib ham mutasaddilardan hech biri ulardan xabar olgani yo'q, bitilgan o'nlab maktublardan birortasiga javob kelmadi. Huquq himoyachilari hol-avhol so'rab, dalda berishadi, Fransiya elchixonasi xodimi biz bilan bog'landi, deydi jurnalistlar.

"Ochlikni qachongacha davom ettirmoqchisizlar" degan savolimga Malohat Eshonqulova shunday javob berdi:

Prezidentga xat
Prezidentga xat

"Qarasak, u tomondan yorug'lik bo'lmaydi. Prezident bu ikki ayolga yon bermaydi. Nega? Islom Karimovdek hammaga kuch-qudrati yetgan odam ikki ojizaga "yengilibdi" degan isnodga qolishni istamaydi. Shu bilan birga bizga zulm ham qila olmaydi. Chunki ikki ojizaga adolatsizlik qilgan zolim sifatida tarixda qolishni xohlamaydi. Irodamiz yetgancha, organizmimiz, vujudimiz ko'targancha ochlik aksiyasini davom ettirishsga qaror qildik".

Malohat Eshonqulova va Saodat Omonova "nolamiz prezidentga yetib borganmikan, yetib borganda ham unga noto'g'ri yetkazishmaganmikan" deya umidsizlanmoqda.

"Prezidentga ovozimizni yetkazishning ming bir usulini qo'llab ko'rdik. Birortasidan foyda bo'lmadi. Shu paytgacha prezidentning bundan xabari yo'q deb o'ylab kelardim. "Noumid - shayton" deyishadiku. Hozir ham "yetib bormagandir, yetsa ham, noto'g'ri mazmunda yetkazishgandir" degan fikrga boraman. "Prezident eshitsa bunday bo'lmasdi" degan umid hali ham vujudimda yashaydi. Ammo qalbimdagi kattakon umid kundan-kunga mittilashib, ertaga o'lib qolmasa, deb qo'rqasan, odam".

Matbuot erkinligi haqida har yili balandparvoz gaplar aytib, ma'ruza qiladigan davlat rahbariga bo'lgan umid so'nib borayotgan bo'lsa-da, xalqaro hamjamiyatga bo'lgan ishonch bu ikki jurnalistda hali yo'qolmagan.

  • 16x9 Image

    Odil Ruzaliev

    Odil O'zbek xizmatiga 2005-yilda kelgan. Diktor va prodyuser. AQShning Tafts Universitetida (Tufts University) xalqaro aloqalar sohasida magistrlik darajasini olgan. Ungacha O'zbekiston TV 1-kanalida ingliz tilidagi yangiliklar – FCN (First Channel News) – ko'rsatuvining muallif-boshlovchisi edi. "Axborot" dasturida mehnat qilgan. Odil ko'p yillar AQShning Toshkentdagi elchixonasi axborot bo'limida ishlagan. O'zbek, ingliz va rus tillarida chop etilgan qator maqolalar muallifi. Farg'ona shahrida tug'ilgan.

    Odil Ruzaliev is a reporter, radio and TV anchor, web editor and producer for Voice of America’s Uzbek Service since 2005. Prior to joining VOA, he worked at the State Radio and TV of Uzbekistan, BBC International’s Central Asia region, and was a regular Contributor for CNN World Report. He has also worked as an Information Assistant at the US Embassy in Tashkent, Uzbekistan. He was the creator and host of the TV program First Channel News, Uzbekistan’s first English language news broadcast. In his spare time he is a freelance photographer. A native of Ferghana Valley, Uzbekistan, Odil graduated from the Uzbekistan State World Languages University. In addition, he was an exchange student at Pace University in New York City and holds a master’s degree in international affairs from the Fletcher School of Law and Diplomacy at Tufts University in Medford, Massachusetts.

XS
SM
MD
LG