Qirg’iziston muvaqqat rahbari Roza Otunbayeva bugun janubiy viloyatlarni ko’zdan kechirib, vaziyat og’ir bo’lsa-da, konstitutsion referendum o’tkazish lozim, degan.
27 iyunda yangi bosh qomus xalq hukmiga havola qilinadi.
Jarayon qanchalik kechiksa, ahvol shuncha og’irlasha boradi, deydi u.
Turkiya va Qozog’iston bu qarorni qo’llab-quvvatlab, muvaqqat rahbariyatni har jihatdan yoqlashini aytmoqda. Bu hukumatni mustahkamlash, unga qonuniy maqom berish uchun muhim.
Turkiya Tashqi ishlar vaziri Ahmet Dovuto’g’li Ostonaga borib, Qozog’iston prezidenti Nursulton Nazarboyev bilan Qirg’izistondagi ahvol haqida gaplashgan. Ikki davlat referendumdan so’ng birgalikda yordam chorasi ko’rishini aytmoqda.
Diplomatik, iqtisodiy va xavfsizlikka doir madad muhokamada.