Pokiston Qurolli Kuchlari Bosh shtabi rahbari general Ashfaq Parvez Kiyaniy AQSh bilan munosabatlarni oydinlashtirish va o'tmishdagi muammolarni muhokama qilish maqsadida AQSh Qurolli Kuchlari Markaziy Qo'mondonligi rahbari general Jeyms Mattis va NATOning Afg'onistondagi qo'mondoni general Jon Allen bilan Ravalpindida uchrashdi.
O'tgan yil 26-noyabrida 24 pokistonlik askar o'limiga sabab bo'lgan NATO havo hujumi va chegaradagi harakatlarni muvofiqlashtirish yo'llari xususida gap ketgan.
O'sha noxush voqeadan so'ng ikki davlat munosabatlari sovuqlashib, Pokiston AQSh va NATO qo'shinlari uchun Afg'onistonga yuk eltuvchi yo'llarni to'sib qo'ygan.
Pokiston parlamenti AQSh bilan aloqalarni qayta ko'rib chiqmoqda va hamkorlikning yangi qoidalari xususida munozara ketmoqda. Pokiston AQShdan voqea uchun uzr so'rashni talab qiladi, ammo Qo'shma Shtatlar nazarida hujum anglashilmovchilik oqibati bo'lgan.
Prezident Obama nazarida rasmiy Islomobod aloqalarni qayta ko'rib chiqish jarayonida AQShning xavfsizlik ehtiyojlari va manfaatlarini ham hisobga olishi lozim.
AQSh va Pokiston harbiy rahbarlari munosabatlarni muhokama qildi
AQSh-Pokiston harbiy muzokaralari, Ravalpindi, 27-mart, 2012-yil