Breaking News

AQSh: Qirg'iziston kelajagini bu xalqning o'zi hal qiladi


Bishkek, 5-oktabr, 2020

Qo'shma Shtatlar Qirg'izistondagi vaziyatni yaqindan kuzatmoqda. Vashington respublikadagi siyosiy kuchlarni zo'ravonlikdan tiyilib, 4-oktabr kuni o'tgan parlament saylovi bilan bog'liq kelishmovchilik va norozilikni tinch yo'l bilan hal etishga chaqirmoqda.

"Qirg'iziston xalqi o'z kelajagi ustida qarorlar qabul qilib, hukumati tarkibini belgilashida va saylovlar qanday tashkil etilishi yuzasidan qaror qilishida AQSh uni quvvatlaydi", - deyiladi Amerikaning Bishkekdagi elchixonasi tarqatgan bayonotda.

"AQSh Qirg'iziston suvereniteti va uning demokratik tizimini hurmat qiladi. O'tgan kunlardagi voqealar ichki siyosiy dinamikani aks ettiradi, tashqi emas", - deya urg'u bermoqda Vashington.

"Bu xalq tarixidagi shunday nozik pallada biz Qirg'izistonning qo'shnilari va xalqaro hamkorlarini bu davlat suverenitetini buzmaslikka chaqiramiz".

16 partiya nomzodlari bellashgan parlament saylovlari muxolifat nazarida adolatsiz kechgan. Saylov ketidan namoyishlar avj olib, Bishkekda norozi fuqarolar hukumat idorasi va parlament binosiga bostirib kirdi.

Prezident Sooronboy Jeenbekov noma'lum manzildan turib, xalqni tinchlanishga, tartibni buzmaslikka chaqirmoqda. Bosh vazir va parlament spikeri favqullodda majlis orqali yangilangan.

Saylov natijalari bekor qilingan. Markaziy saylov komissiyasiga ko'ra, mamlakat hozirgi beqaror muhitda qayta ovoz berishga tayyor emas. Vaziyat qaltis, mitinglar davom etmoqda, nafaqat poytaxtda, balki janubdagi yirik shahar O'shda ham. Mahalliy rahbarlar ham ishdan olinmoqda, o'zini yangi hokim qilib tayinlash hollari kuzatilmoqda.

O'zbekiston, Qozog'iston va Rossiya Qirg'izistondagi to'polonlar yuzasidan jiddiy xavotir bildirgan va davlat qonunlari asosida ish tutishga undagan.

  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

Facebook Forum

XS
SM
MD
LG