Breaking News

AQShga suzib kelayotgan kubaliklar soni oshmoqda


Florida qirg'oqlariga qayiqda yetib kelgan kubalik muhojirlar

O’tgan bir hafta ichida 500 dan ortiq kubalik Florida qirg’og’iga suzib kelgan. Kommunistik rejimdan qochib, noqonuniy tarzda AQSh hududiga kirishga urinayotganlar soni so’nggi paytlarda ko’paymoqda.

160 kilometrlik xavfli dengiz sayohatida ko'p yillar davomida minglab odam halok bo'lgani aytiladi. Ammo bu o'z yurtidagi siyosiy va iqtisodiy inqirozdan qochib farovon hayot umidida yo’lga chiqayotganlar sonini kamaytira olmayapti.

Sohil xavfsizlik xizmati kubalik muhojirlar yo’lini to’sib, ularni ortga qaytarishga harakat qiladi. 1-oktabrdan beri dengizda 4200 ga yaqin odamning yo’li to’silgan. Bu bir kunda taxminan 43 kishiga to’g’ri keladi. O’tgan yili kunlik dengizda tutilganlar soni 17 tani, 2020-21 moliyaviy yilda esa kuniga atigi ikkitani tashkil qilgan.

Sohil qo’riqchilarining sa’y-harakatlariga qaramay, noma’lum miqdordagi kubaliklar qirg’oqqacha yetib keladi.

"Orzularimga erishish va oilamga yordam berish uchun o'lishga ham tayyorman. Kubadagi vaziyat yaxshi emas", - deydi sohilgacha yetib kelgan kubaliklardan biri “Mayami Herald” nashriga.

Ki-Uest shahridan 110 kilometr g'arbda joylashgan yetti oroldan iborat Dray-Tortugas milliy bog'i chorshanba kuni tashrif buyuruvchilar uchun yopilgan; chunki AQSh hafta boshida u yerga kelgan muhojirlarni evakuatsiya qilgan. Odatda, bu yerga kuniga 255 ga yaqin sayyoh orollar va bundan 160 yil avval qurilgan Fort Jefferson qal’asini ko’rish uchun qayiq va suv samolyotlarida keladi. Rasmiylar milliy parkning qachon qayta ochilishini ma’lum qilmagan.

Kubaliklar tavakkal qilishga tayyor, chunki AQSh tuprog'iga kelganlar, hatto ularning huquqiy maqomi noaniq bo'lsa ham, deyarli har doim shu yerda qolishadi. Ular, shuningdek, quruqlik orqali Nikaraguaga uchib, so'ngra shimolga, Gonduras va Gvatemala orqali Meksikaga borishadi. 2021-22-moliyaviy yilida 220 000 kubalik AQSh-Meksika chegarasida to'xtatilgan. Bu avvalgi yilga qaraganda deyarli olti baravar ko'p.

Floridadagi immigratsiya bo'yicha advokat Kallan Garsiyaning aytishicha, AQShga kelgan kubaliklarning ko'pchiligi Chegara xizmati xodimlariga uyda yetarli ish topa olmasligini aytishadi. Keyin ular mamlakatga noqonuniy ravishda kirgan deb "olib tashlash uchun tezlashtirilgan" belgisi qo'yiladi. Ammo bu ular tezda yoki umuman yo'q qilinadi, degani emas.

AQSh va Kuba o'rtasida rasmiy diplomatik aloqalar yo'qligi sababli, Amerika hukumati ularni vataniga qaytarishning imkoni yo'q. Kubaliklar ozodlikka chiqariladi, ammo ularga manzili va maqomini tasdiqlash uchun vaqti-vaqti bilan federal immigratsiya organlariga murojaat qilib turish majburiyati yuklanadi. Ularga ishlash uchun ruxsatnoma, haydovchilik guvohnomalari va ijtimoiy sug'urta raqamlarini olishga ham ruxsat beriladi, lekin doimiy yashash ruxsatnomasi yoki fuqarolik olish imkoniyatiga ega bo’lmaydi.

Garsiyaning aytishicha, bu ularning umri oxirigacha davom etishi mumkin. 1980-yilda kelgan kubaliklar orasida hali ham huquqiy maqomsiz yurganlar bor.

Kubalik muhojirlarning kichik bir qismi Chegara xizmati xodimlariga siyosiy ta'qibdan qochayotganliklarini aytishadi. 1966-yilda qabul qilingan Kubani tartibga solish to'g'risidagi qonunga binoan, ular immigratsiya bo'yicha sudyaga o'z da'volarini topshirishlari mumkin. Agar ma'qullansa, ular doimiy yashash huquqini olishlari va keyinchalik fuqarolik uchun ariza berishlari mumkin.

Boshqa tomondan, gaitilik muhojirlar deyarli har doim qaytarib yuboriladi, garchi u yerda siyosiy ta'qib va zo'ravonlik, og'ir iqtisodiy qiyinchiliklar bo'lsa ham.

"Ushbu nomuvofiqlik immigrantlar huquqlari himoyachilari har doim ta'kidlab keladigan masala", - deydi Garsiya.

  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

Facebook Forum

XS
SM
MD
LG