Breaking News

AQSh: Tolibon Afg'onistonning biror viloyatida xo'jayin emas


Elis Uells, AQSh Davlat kotibining Janubiy va Markaziy Osiyo bo'yicha muovini

AQSh Davlat kotibining Janubiy va Markaziy Osiyo bo'yicha muovini Elis Uells (Alice Wells) 19-sentabr kuni Vashingtonda Kongress a'zolari huzurida hisobot berar ekan, ularni Afg'onistonda vaziyat nazorat ostida, deya ishontirishga harakat qildi.

Yetakchi diplomat deydiki, AQSh 18 yil oldin Afg'onistonga kirib, Tolibonni hokimiyatdan olganida bu mamlakat terrorizm va ekstremizm o'chog'i bo'lmaydi, deya maqsad qilgan edi.

"Biz bu maqsadimizga erishdik. AQSh uning NATOdagi ittifoqchilari sa'y-harakati bilan yutuqqa erishdi, deya olamiz. 2001-yildan beri hech kim Afg'onistondan turib Amerika sarhadida biror hujum rejalab amalga oshirgani yo'q", - dedi Uells xonim.

Tolibon xurujlaridan keyingi manzara, Kobul, 17-sentabr, 2019
Tolibon xurujlaridan keyingi manzara, Kobul, 17-sentabr, 2019

Vakillar palatasining Tashqi aloqalar qo'mitasida so'zlar ekan, diplomat Afg'onistonda xavfli elementlar hamon talay ekani, ildizi tamoman yo'q qilinmagani, ekstremist kuchlar nafaqat afg'on xalqi balki unga yordam berib kelayotgan barcha tomonlarga tahdid solayotganini tan oldi.

AQSh hukumati hujjatlarida Afg'oniston hududining kamida 50 foizida Tolibon faol ekani qayd etiladi. Jangarilar katta hududlarni egallab olib, u yerda o'z hukmini o'tkazmoqda. Qurolli guruhlar aholini ezib, talon-taroj qilayotganiga nisbatan rasmiy hokimiyat chora ko'ra olmayapti.

"Tolibon biror viloyatni idora etmaydi, ya'ni ma'muriy markazlarda biz quvvatlagan hukumat vakillari o'tiribdi. Jangarilar vaqti-vaqti bilan bosqinchilik qilib turadi; jang qilib biror joyni egallaydi va yana chekinadi. Bu albatta beqarorlik, lekin Afg'onistonni markaziy hukumat boshqarmoqda, Tolibon yoki boshqa jangarilar emas", - deydi davlat kotibi muovini.

AQSh Vakillar palatasi, 19-sentabr, 2019
AQSh Vakillar palatasi, 19-sentabr, 2019

Uells xonim Kongressdagi chiqishida Markaziy Osiyo davlatlari va Afg'oniston orasida hamkorlik oshganiga alohida to'xtaldi. Savdo kengayib bormoqda, madaniy-ta'limiy rishtalar jadallashgan va afg'onlar shimoldagi qo'shnilaridan ko'proq madad olmoqda, dedi Uells.

O'zbekiston afg'onlarni murosaga chorlab, diplomatik harakatlar olib bormoqda. Markaziy hukumat va toliblar muzokarasi uchun mezbonlik qilishga shay. Bu uchrashuv balki Samarqandda o'tadi deya kutilayotgan edi.

Lekin Tolibon bilan alohida muloqot olib borayotgan Tramp ma'muriyati uni to'xtatdi. Prezident Donald Tramp hozircha jangarilar bilan gaplashmoqchi emas.

Bu degani undan keyin ko'zlangan har qanday tashabbus ham kutishga majbur. Toshkent va Vashington bir-birini xabardor qilib turibdi, tomonlar maqsad va strategiyani tushunadi, deydi yaqinda O'zbekistonda bo'lib, rahbariyat bilan so'zlashgan amerikalik rasmiylar.

Tolibon yaqinda O'zbekistonda bo'ldi, Toshkent, 8-avgust, 2019
Tolibon yaqinda O'zbekistonda bo'ldi, Toshkent, 8-avgust, 2019

Yaqinda Tolibonni Toshkentda iliq kutib olib mehmon qilgan O'zbekiston Tashqi ishlar vaziri Abdulaziz Komilov AQShdan borgan delegatsiyaga "davlatimiz Afg'oniston barqaror yashashini istaydi", deb aytgan. O'zbekiston qo'shni davlatdagi vaziyatga befarq emas, tinchlik tomon qadam tashlashni targ'ib qilmoqda, deydi diplomatlar.

Uells xonimning tushuntirishicha, Vashington Tolibonga keskin shartlar qo'ygan va u bilan kelishsagina, markaziy hukumat va boshqalarni Tolibon bilan muzokaraga chorlashi mumkin edi.

Buyog'iga nima bo'ladi? Vashingtonda bu borada aniq bir gap yo'q.

Afg'onistondagi qo'shinlar hozirgi missiyasini davom ettiradi - jangari va ekstremistlarga qarshi maxsus amaliyotlar olib boradi va afg'on harbiylarining malakasini oshiradi.

Zalmay Halilzod, AQShning Afg'oniston bo'yicha maxsus vakili. Uning Tolibon bilan olib borayotgan muloqoti to'xtatilgan.
Zalmay Halilzod, AQShning Afg'oniston bo'yicha maxsus vakili. Uning Tolibon bilan olib borayotgan muloqoti to'xtatilgan.

Tolibon bilan gaplashgan AQSh maxsus elchisi Zalmay Halilzod Kongress a'zolari bilan uchrashib, ularning savollarga javob bergan, lekin yopiq eshiklar ortida.

Uells ochiq tinglovda so'zlar ekan, diplomatik, taraqqiyot va harbiy missya birdek davom etadi va "Afg'oniston ravnaqi uchun har jihatdan hissa qo'shaveramiz", dedi.

Afg'onistonga tashqi dunyo berayotgan yordamning chorak qismi Amerikadan. Boshqa davlatlar ham hissani oshirar ekan, AQShniki sal kamaydi, deydi Uells.

Afg'oniston xavfsizligini ta'minlash uchun Vashington kelasi yil 4 milliard dollar ajratishni rejalagan.

28-sentabrda Afg'onistonda prezident saylovlari. AQSh biror nomzodga yon bosmasligini bildirmoqda. 17 nomzod bor, jumladan amaldagi rahbar Ashraf G'ani va Bosh vazir Abdulla Abdulla. Asosiy kurash shu ikki kishi orasida, chunki ommaviy so'rov natijalariga ko'ra, ular eng ko'p tarafdorlarga ega.

Afg'oniston prezident saylovlari arafasida
Afg'oniston prezident saylovlari arafasida

  • 16x9 Image

    Navbahor Imamova

    Navbahor Imamova - "Amerika Ovozi"ning yetakchi multimedia jurnalisti. "Amerika Manzaralari" turkumidagi teledasturlar muallifi. Ko'rsatuvlar taqdim etish bilan birga prodyuser, muxbir va muharrir. O'zbekistonda akkreditatsiyadan o'tgan yagona amerikalik jurnalist. "Amerika Ovozi"da 2002-yildan beri ishlaydi. Jurnalistik faoliyatini 1996-yilda O'zbekiston radiosining "Xalqaro hayot" redaksiyasida boshlagan. Jahon Tillar Universiteti Xalqaro jurnalistika fakultetida dars bergan. Ommaviy axborot vositalari bo'yicha bakalavrlikni Hindistonning Maysur Universitetidan (University of Mysore), magistrlikni esa AQShning Bol Davlat Universitetidan (Ball State University) olgan. Shuningdek, Garvard Universitetidan (Harvard University) davlat boshqaruvi va liderlik bo'yicha magistrlik diplomiga ega. Jurnalistik va ilmiy materiallari qator xalqaro manbalarda chop etilgan. Amerikaning nufuzli universitetlari va tahlil markazlarida so'zlab, ma'ruzalar o'qib keladi. "Amerika Ovozi" oltin medali sohibi. Toshkent viloyati Bo'stonliq tumani Qo'shqo'rg'on qishlog'ida ziyoli oilasida ulg'aygan.

    Navbahor Imamova is a prominent Uzbek journalist at the Voice of America. As anchor, reporter, multimedia editor and producer, she has covered Central Asia and the U.S. for nearly 20 years on TV, radio and online. For the last year, she has also been reporting from inside Uzbekistan as the first-ever U.S.-based accredited correspondent in the country. During 2016-2017, she was a prestigious Edward S. Mason Fellow in public policy and management, while earning her Mid-Career Masters in Public Administration at Harvard University’s John F. Kennedy School of Government. Imamova played a pivotal role in the launch of Uzbek television programming at VOA in 2003, and has since presented over 800 editions of the flagship weekly show, “Amerika Manzaralari,” which covers American foreign policy focusing on Washington’s relations with Central Asia, as well as life and politics in the U.S. She speaks frequently on regional issues in Central Asia, as well as Uzbek politics and society, for policy, academic, and popular audiences. Her analytical pieces have been published in leading academic and news outlets including Foreign Policy and The National Interest. Imamova also is the founding President of the VOA Women’s Caucus. She began her career at the Uzbek state broadcaster in Tashkent. She holds a Bachelor of Arts in journalism and mass communication from the University of Mysore, India and a Master of Arts in journalism from Ball State University, Indiana.

Facebook Forum

XS
SM
MD
LG