Germaniya kansleri Angela Merkel to'rtinchi muddatga saylandi

  • Amerika Ovozi

Bugun Germaniyada o'tgan federal saylovlarda xalq kelasi to'rt yil uchun yangi hukumat va kanslerga ovoz berdi. Amaldagi rahbar, Xristian demokratlar partiyasidan Angela Merkel tarixiy g'alabani qo'lga kiritib, to'rtinchi muddatga saylandi. Ko'pchilik uni barqarorlik garovi deb biladi.

Dastlabki natijalarga qaraganda, Merkel boshchiligidagi konservativ kuchlar qariyb 33 foiz ovoz olgan. Endi koalitsion hukumat tuzish bo'yicha muzokaralar boshlanadi.

Saylov shunisi bilan ahamiyatliki, Ikkinchi jahon urushidan beri ilk marotaba Germaniya parlamenti Bundestagdan millatchi ruhdagi Muqobil Germaniya partiyasi ham joy oladi. Ular 13,5 foiz ovoz yig'gan.

Angela Merkelning amaldagi hukumatdagi ittifoqchisi, Sotsial-demokratlar 20 foiz bilan uchinchi o'rinni egalladi. Partiya rahbari Martin Shults muxolifatga o'tishini bildirdi.

Yangi hukumat oldida murakkab malasalar turibdi: Britaniyaning Yevropa Ittifoqidan ajralib chiqishi, terrorizm, iqlim o'zgarishi va Shimoliy Koreya tahdidlari. Ichki siyosatda esa asosiy masala - immigratsiya.

Sotsial-demokratlar partiyasi rahbari Martin Shults
Sotsial-demokratlar partiyasi rahbari Martin Shults

Merkel saylov kampaniyasi davomida xalqiga katta va'da bermadi. U e'tiborni, asosan, ish o'rinlarini ko'paytirish va soliqlarni biroz kamaytirishga qaratdi. Sotsial-demokratlar esa badavlat fuqarolar solig'ini oshirish, qashshoqlikni kamaytirish, infrastruktura va ta'lim sohasiga sarmoyani oshirishni va'da qilgan.

Merkelning 2015-yilgi "ochiq eshiklar" siyosati doirasida Germaniya bir milliondan ziyod qochqinni qabul qilgan edi. Ularga boshpana berish qarorimiz to'g'ri edi, deydi kansler, lekin kelajakda bu takrorlanmaydi.

Ultra-o'ngchi va aksil-immigrant ruhdagi Muqobil Germaniya partiyasi parlamentdan joy olgani ko'pchilikni hayratda qoldirdi.

"Merkel mamlakatimiz chegaralarini qochoqlarga ochgani bizga qo'l keldi, saylovchilar orasida kuchli norozilik uyg'otdi", - deydi partiya yetakchisi Aleksandr Goland.

Yetakchi siyosatchilar aholini saylovda faol qatnashishga undadi. "Qatnashmasangiz, kelajakni boshqalar belgilaydi", deydi ular, neo-nasistlar, millatchi va ekstremistlarga ishora qilib.

To'rt yil ilgari ovoz berish huquqiga ega 61,5 million fuqarodan 29 foizi saylovga chiqmagan.

  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

Facebook Forum

XS
SM
MD
LG