Breaking News

Vatandoshlar saylovda qanchalik faol?


O'zbekistonning Vashingtondagi elchixonasida 100 dan ortiq fuqaro ovoz berdi. Saylov uchastkasi ertalab 6 dan kech 8 gacha ochiq.
O'zbekistonning Vashingtondagi elchixonasida 100 dan ortiq fuqaro ovoz berdi. Saylov uchastkasi ertalab 6 dan kech 8 gacha ochiq.

Xorijda yurgan fuqarolar ovoz berishni istasa, tegishli elchixona yoki konsullikka borib fuqarolik huquqidan foydalanishi mumkin. Diplomatik vakolatxonalar saylovda qatnashishni yoki biror nomzodni targ'ib qila olmaydi, biroq fuqaroga ovoz berish imkoniyatini yaratib berishi kerak.

O'zbekistonning Vashingtondagi elchixonasi mahalliy vaqt bilan ertalab 6 da ochildi va kech 8 gacha ochiq turib, pasporti bilan kelgan, tegishli yoshdagi vatandoshlarni qabul qildi. Saylovchilarga issiq choy, somsa va kunning yarmiga borib osh taklif qilindi. Ayrim vatandoshlar farzandlari bilan kelib, elchixonani tomosha qilishdi.

Tushgacha 100 ga yaqin odam keldi. "Amerika Ovozi" ning kuzatishcha, ovoz berganlarning aksariyati yoshlar, asosan Vashington va uning atrofida yashab ishlaydigan mutaxassislar. Uzoqdan turib yoki elektron ravishda ovoz berish imkoniyati mavjud emas ekan, Amerika bo'ylab yashayotgan o'n minglab fuqarolar bu huquqdan foydalana olmaydi. Vashingtondagi elchixona va Nyu-Yorkdagi konsullikka yaqin bo'lsangizgina, saylovda qatnashish mumkin.

Jorj Vashington universitetida huquqshunoslikdan ta'lim olayotgan Dilshod Zokirov faol vatandoshlardan. Ovoz berish konstitutsiyaviy huquq, deydi u, "Amerika Ovozi" bilan suhbatda. Saylovda qatnashish imkoniyati bor ekan, vatan kelajagiga loqayd bo'la olmaysiz. Ovoz berish burch va sharaf, deydi Zokirov. (Quyida elchixona oldidan berilgan reportajni tinglang)

Saylov-2015: Vatandoshlar ovoz berdimi? O'zbekistonning AQShdagi elchixonasi - Navbahor Imamova
Iltimos, kuting...

No media source currently available

0:00 0:07:37 0:00

Dekabr oyida o'tgan parlament saylovlarida Vashingtondagi elchixonada 86 kishi ovoz bergan. Nyu-Yorkdagi konsullikka kelganlar bundan ko'p, chunki Nyu-York va uning atrofida o'zbekistonliklar kattaroq sonni tashkil etadi. Aniq hisob mavjud emas, biroq jamoa faollarining taxminicha, Qo'shma Shtatlar bo'ylab 300 mingga yaqin o'zbek bor. Ularga O'zbekiston fuqarosi bo'lmaganlar ham kiradi. Biroq respublika pasportiga ega immigrantlar ko'pchilikni tashkil etishiga shubha yo'q.

Umuman olganda, vatandagi saylovlarda qatnashishga xohish u qadar kuchli emas. Muhojirlar yangi mamlakatdagi hayot tashvishlari bilan band. Ish, o'qish, oila va tirikchilik - asosiy masalalar. Qolaversa, elchixona va konsulliklar uzoq. Bir vatandoshning hazilomuz aytishicha, "ovoz beraman deb hozir Toshkentdan Moskvadek joyga borib kelarmidim?"

"Amerika Ovozi" bilan gaplashganlarning aksariyati Islom Karimovni quvvatlashini bildirdi. Sabab - ular boshqa nomzodlarni bilmaydi va ularning haqiqiy nomzod ekaniga ishonmaydi.

Bu saylovlar ijtimoiy tarmoqlar hukmron zamonda o'tar ekan, ovoz berishga qiziqmaganlar ham internetda bu voqea muhokamasi bilan band. Prezident Islom Karimov va qolgan uch nomzod haqida qizg'in bahs-munozaralarga guvohmiz. Yoshlar orasida Karimovni quvvatlayotganlar ko'p. Lekin tuzumning tanqidchilari ham faol.

Ushbu saylov, qolaversa, 2014-yilning dekabrida kechgan parlament saylovlari rasmiy matbuotda emas, ijtimoiy tarmoqlarda kengroq va erkinroq yoritilgani o'ziga xos tarixiy o'zgarishdir. Bu sharhni saylovchilarning o'zidan eshitasiz.

Yevropadagi huquq himoyachilari va faollar olib borgan virtual saylov, ularda qatnashgan muqobil nomzodlar, ular olg'a surgan g'oyalar ham xorijda yurgan o'zbekistonliklarni o'ziga tortdi va bahsli mavzuga aylandi.

"Facebook", "Instagram", "Twitter", "Odnoklassniki" va "VKontakte" singari ijtimoiy platformalarda O'zbekiston fuqarolarining o'zgacha faxr bilan ovoz berayotganini aks ettirgan tasvirlarni ko'rasiz. Taniqli shaxslardan tortib, oddiy shaxslargacha. Yangicha axborot vositalari barq urayotgan zamonda hamma o'z mikrofoniga egadek. Fikringiz, munosabatingizni dunyoga bildirish uchun siz matbuot xizmatiga muhtoj emassiz. Ijtimoiy tarmoqlar siz uchun ochiq sahna.

Xorijda yurganlar uchun bu vositalar vatan bilan bog'lanish, yurtdoshlar bilan aloqa qilishda qo'l keladi.

Hukumat va davlat rahbariga ishonch qanchalik ekanidan qat'i nazar, saylov jamoatchilik munosabatini oydinlashtiradi, siyosiy qarashlarni aks ettiradi.

Prezident Islom Karimov yana bir bor nomzod bo'lishga haqlimidi? Konstitutsiya nima deydi? Markaziy saylov komissiyasi nima deyapti? Dunyo bunga qanday qaramoqda? Karimov shu kungacha nimani epladi? Nimani eplamadi? O'zbeklar qanday rahbarga muhtoj? Kim bu davlatni to'g'ri boshqara oladi? Haqiqiy muxolifat vujudga kelishi uchun nima qilmoq zarur? Xorijdagi muxolif guruhlar qanday rol o'ynaydi? Saylov o'zi nima? Ovoz berishning ahamiyatini tushunamizmi? Demokratiya nima? Saylov oldidan ijtimoiy tarmoqlarda va boshqa axborot vositalarida mana shu savollar ko'tarildi.

Umidsizlanganlar ko'p, biroq shu fursatda o'z fikri va g'oyalarini ulashishga harakat qilganlar ham oz emas.

Qo'shma Shtatlar O'zbekistondagi saylovni Toshkentdagi elchixonasi va u a'zo Yevropada Xavfsizlik va Hamkorlik Tashkiloti orqali kuzatmoqda. Saylov oldidan biror bayonot berilmadi. Rasmiylarning aytishicha, jarayon qanday o'tgani yuqorida nomi tilga olingan organ bergan hisobotga qarab baholanadi.

  • 16x9 Image

    Navbahor Imamova

    Navbahor Imamova - "Amerika Ovozi" teleradiosining yetakchi multimedia jurnalisti. "Amerika Manzaralari" turkumidagi teledasturlar muallifi. Ko'rsatuvlar taqdim etish bilan birga prodyuser, muxbir va muharrir. O'zbekistonda akkreditatsiyadan o'tgan yagona amerikalik jurnalist. "Amerika Ovozi"da 2002-yildan beri ishlaydi. Jurnalistik faoliyatini 1996-yilda O'zbekiston radiosining "Xalqaro hayot" redaksiyasida boshlagan. Jahon Tillar Universiteti Xalqaro jurnalistika fakultetida dars bergan. Ommaviy axborot vositalari bo'yicha bakalavrlikni Hindistonning Maysur Universitetidan (University of Mysore), magistrlikni esa AQShning Bol Davlat Universitetidan (Ball State University) olgan. Shuningdek, Garvard Universitetidan (Harvard University) davlat boshqaruvi va liderlik bo'yicha magistrlik diplomiga ega. Jurnalistik va ilmiy materiallari qator xalqaro manbalarda chop etilgan. Amerikaning nufuzli universitetlari va tahlil markazlarida so'zlab, ma'ruzalar o'qib keladi. "Amerika Ovozi" oltin medali sohibi. Tashkilotda gender va jurnalistika bo'yicha kengash raisi. Toshkent viloyati Bo'stonliq tumani Qo'shqo'rg'on qishlog'ida ziyoli oilasida ulg'aygan.

    Navbahor Imamova is a prominent Uzbek journalist at the Voice of America. As anchor, reporter, multimedia editor and producer, she has covered Central Asia and the U.S. for more than 20 years on TV, radio and online. Since 2018, she has also been reporting from inside Uzbekistan as the first-ever U.S.-based accredited correspondent in the country. During 2016-2017, she was a prestigious Edward S. Mason Fellow in public policy and management, while earning her Mid-Career Master in Public Administration at Harvard University’s John F. Kennedy School of Government. Navbahor played a pivotal role in the launch of Uzbek television programming at VOA in 2003, and has since presented more than 1000 editions of the flagship weekly show, “Amerika Manzaralari” (Exploring America), which covers American foreign policy focusing on Washington’s relations with Central Asia, as well as life and politics in the U.S. She speaks frequently on regional issues in Central Asia, as well as Uzbek politics and society, for policy, academic, and popular audiences. Her analytical pieces have been published in leading academic and news outlets including Foreign Policy, The National Interest, and the Atlantic. Navbahor also is the founding President of the VOA Women’s Caucus. She began her career at Uzbekistan’s state broadcasting company in Tashkent. She holds a Bachelor of Arts in journalism and mass communication from the University of Mysore, India and a Master of Arts in journalism from Ball State University, Indiana.

Shu mavzuda

XS
SM
MD
LG