AQSh Global Media Agentligi tomonidan moliyalanadigan Ochiq Texnologiya Fondi o'z ishini to'xtatishi mumkin, chunki mablag' qirqiliadi degan xavotir kuchaymoqda. 2012-yilda tuzilgan nohukumat tashkilot repressiya kuchli mamlakatlarda mustaqil ovoz va liberal qadriyatlarni olg'a surgan faollar va mutaxassislarga raqamli texnologiya sohasida moddiy va professional yordam berib keladi.
2020-yil uchun fondga 21 million ajratilgan. Yaqinda AQSh Global Media Agentligi rahbariyati yangilandi va fond boshlig'i ishdan olindi. Tashkilot bilan ishlayotgan tomonlar xavotirda: faoliyatda o'zgarishlar bo'lishi va mablag' kamayishi mumkin.
Chunki Maykl Pek, agentlikning yangi rahbari, vaqtincha moliya oqimini to'xtatgan. Yangi boshqaruvga o'tilar ekan, bu zarur chora, deya tushuntiradi mutasaddilar.
Pekning qarorlariga qarshilik kuchayib, bir necha sobiq elchi, agentlikning oldingi boshqaruv kengashi a'zolari va boshqalar federal sudga arz qilgan. Sudya murojaatni qabul qilmadi, lekin shikoyatchilar apellyatsiya tartibida murojaat qilib, javob kutmoqda.
Ochiq Texnologya Fondi ishi to'xtab qolmasligini talab qilib, 500 dan ortiq tashkilot, xususan "Mozilla" singari yetakchi internet kompaniyalari AQSh Kongressidan yordam so'ragan.
Maykl Pek, AQSh Global Media Agentligining yangi rahbari
Agentlik bu boradagi savollarga hali javob bermagan. Pek sal oldingi intervyularida fond faoliyati tahlil ostida ekanini aytib, uning kelajagi xavf ostida emas, degan.
Ochiq Texnologya Fondi nafaqat agentlik orqali Kongressdan, balki xususiy manbalardan ham moliya oladi. Ochilganidan beri 50 dan ortiq tashkilotga 50 mingdan 200 ming dollargacha grant bergan.
Axborot oqimi cheklangan muhitlardagi erkin ovozlarni rag'batlantirish bilan birga fond senzuraga qarshi treninglar ham olib boradi. Texnik va yuridik choralar ko'rishni o'rgatadi. Bloklarni chetlab o'tish sirlarini ulashish bilan birga 200 dan ortiq tilda maxsus programmalar taklif qiladi.
2013-2016 yillarda fond OTF "Signal" aloqa tizimi uchun 3 million dollar ajratgan. Yana 3 million dollar "Tor" degan tarmoqqa berilgan. "Tor" bloklangan muhitda anonim tarzda istagan sayt va platformaga kirish imkoniyatini beradi.
"Let’s Encrypt", bizneslarni xakerlar va kiber hujumlardan asrovchi sistema, "WireGuard" singari VPN, ya'ni bloklarni hatlab o'ta oladigan programmalarga ham Ochiq Texnologya Fondi homiylik qilgan.