Breaking News

AQSh va Kanadadagi vatandoshlar O'zbekiston uchun mablag' yig'moqda


O'zbekiston tibbiy xodimlari koronavirusdan tuzalgan bemorlarni uyiga kuzatmoqda (Koronavirusinfouz)

Joriy haftada Amerika Qo'shma Shtatlari va Kanadadagi o'zbekistonliklar jamiyatlari “Biz O'zbekistonga befarq emasmiz” xayriya fondini tuzdi. Maqsad - COVID-19 pandemiyasi davrida O'zbekiston hukumati va xalqiga yordam qo'lini cho'zish.

Jamg'arma AQSh, Kanada va umuman Amerika qit'asida yashaydigan vatandoshlar tomonidan o'tkaziladigan xayr-ehsonlar hisobidan to'ldiriladi. Vatanga yordam ko'rsatish haqida 8 -aprel kuni AQSh va Kanadadan 28 o'zbekistonlik faol, vatandoshlarning jamiyatlari rahbarlari, xalqaro tashkilotlarda ishalyotgan o'zbekistonliklar hamda respublika diplomatlari ishtirokida videokonferensiyada kelishib olingan.

Anjumanni Nyu-Yorkdagi “Mahalla USA” o'zbekistonlik immigrantlar nodavlat tashkiloti o'tkazgan. Yig'inga moderatorlik qilgan Dilshod Zokirov, “Mahalla USA” vitse-prezidentiga ko'ra, jamg'arma hisobiga tushgan mablag' Oliy Majlis Senati tashabbusi bilan tashkil etilgan “O'zbekiston mehr-shavqat va salomatlik” jamoat fondiga o'tkaziladi.

Zokirovning tushuntirishicha, kelishuvga muvofiq Amerika va Kanada hududlarida to'plangan mablag' O'zbekistondagi shifoxonalarning moddiy-texnik bazasini kuchaytirish, bemorlarning sog'lig'ini tiklash, tibbiy asbob-uskunalar, dori va gigiyenik himoya vositalarini sotib olish, tibbiy kislorodni jamlash va tarqatish stansiyalarni qurish hamda yo'qsillarga oziq-ovqat tarqatish yo'lida sarflanadi.

Vatandoshlar vatanga yordam berishga bel bog'lagan
Vatandoshlar vatanga yordam berishga bel bog'lagan

“Bunday jamg'armaga ayni damda ehtiyoj bor”, - deydi Bahodur Qudratov, o'zbekistonlik vatandoshlarning Pensilvaniya shtati Filadelfiya shahrida faoliyat yuritayotgan tashkiloti rahbari.

“Biz Amerikadagi o'zbekistonliklar uchun koronavirus pandemiyasi davrida O'zbekistonga yordamni amalga oshirishimiz ayni paytdagi muhim vazifalardan biri”, - deya tushuntirar ekan Qudratov, tashkiloti jamg'armaga ushbu maqsadga erishish yo'lida yordamga tayyorligini bildirdi.

Filadelfiyadagi tashkilot ta'sis etgan haftalik radiodastur orqali jamg'arma maqsad va mohiyatini vatandoshlar orasida targ'ib qilishini aytdi.

Chikagodagi O'zbek-Amerika uyushmasi ahbari Olimjon Sharipov Amerikadada yashayotgan har bir vatandoshning O'zbekistonda yaqinlari bor ekan, ular ona yurtdagi vaziyatdan xabardor ekanini aytadi.

Jamg'armaga mablag' GoFundme platformasi orqali yig'ilmoqda. Tashkilotchilar uning sarf-xarajati shaffof bo'ladi deya va'da bermoqda.

O'zbekistonning AQSh va Kanadadagi elchisi Javlon Vahobov tashabbusni quvvatlab, vatandoshlar bilan yakdil ekanini hamda elchixona bu jarayonda yordam berib, hamkorlik qilishini bildirgan.

  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

Facebook Forum

XS
SM
MD
LG