Breaking News

Tramp: Koronavirus olib ketgan amerikaliklar uchun duo qilamiz


Oq uy, 27-aprel, 2020

"Amerikaning yuragi bir. Bittamiz chekkan azobni hammamiz his qilamiz. Koronavirus oramizdan olib ketgan amerikaliklar uchun duo qilamiz", - dedi Prezident Donald Tramp bugun Oq uyda so'zlar ekan.

"Ikki oy oldin dunyodagi eng mustahkam iqtisodiyotga ega edik. Uni yana oyoqqa turg'azamiz. Zudlik bilan harakat qilamiz".

Trampga ko'ra, uning maslahatchilari pandemiya chekinayotganini aytgan va Amerika qayta ochilish uchun hozirlik ko'rmoqda.

"Millionlab mehnatkashlar ishga qaytishni istaydi, tirikchiligini tiklashni xohlaydi. Ularga bu imkoniyatni albatta yaratib beramiz", - deydi prezident.

Tizimga misli ko'rilmagan darajada ziyon yetdi va buning zararini xalq ko'rmoqda, deydi u.

Pandemiya sabab butun xususiy sektor, notijoriy tarmoqlar, ta'lim tizimi va boshqa sohalar - barchasi sustlashdi va aksariyat hollarda faoliyatini to'xtatishga majbur bo'ldi.

Prezident Tramp 24-aprelda imzo chekkan qonunga ko'ra, Amerika kichik bizneslariga qariyb 500 milliard dollarlik yordam berilmoqda
Prezident Tramp 24-aprelda imzo chekkan qonunga ko'ra, Amerika kichik bizneslariga qariyb 500 milliard dollarlik yordam berilmoqda

28-aprel kuniga kelib, virusni yuqtirganlar Amerika bo'ylab 1 milliondan oshdi. O'lganlar esa 60 mingga yaqinlashdi. Tuzalganlar 140 mingdan ziyod.

Dunyoda kasallanganlar soni 3 milliondan o'tdi. Vafot etganlar 218 mingga yetib qoldi. Sog'ayganlar qariyb 1 million.

Moliyaviy ko'mak bois 1,6 million kichik biznes saqlab qolindi, 30 million ish o'rni boy berilmadi, deydi Tramp.

Kongress ajratgan 2,2 trillion dollarlik ko'mak paketi har bir soha uchun ko'zlangan edi. Aksariyat amerikaliklar hukumatdan chek oldi.

Prezident fikricha, bu o'ta muhim madad va dalda bo'ldi.

Indiana shtati kasalxonalarida
Indiana shtati kasalxonalarida

Koronavirus testi kengaytirilgan holda davom etadi, deydi Vitse-prezident Mayk Pens. Hozirgacha 6 millionga yaqin odam bu mamlakatda ko'rikdan o'tgan.

Normal hayotga qaytish uchun kuniga 500-700 ming kishi testdan o'tishi lozim, deya ogohlantirmoqda mutaxassislar. Tizim buni eplay oladimi?

"Albatta eplaymiz", - deya javob qildi Pens, kechagi brifingda.

Oq uy shtatlarga bu borada ko'rsatma yuborgan. Shtatlar qachon ochilishni o'zlari hal qiladi, lekin federal hukumat nimaiki yordam kerak bo'lsa, beradi, deydi prezident.

  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

Facebook Forum

XS
SM
MD
LG