Breaking News

"Fond Forum" yopildi, @gulnarakarimova esa bir o'chadi, bir yonadi


Photo: Fund Forum

"Fond Forum" degan nom ostida tanilgan "O'zbekiston madaniyati va san'ati forumi" jamg'armasi yopildi. Uning asoschisi va rahbari Gulnora Karimova bu borada e'lon qilib, tashkilotda ishlaganlarga minnatdorchilik bildirdi.

"Fond Forum" chiqargan bayonotda sabablar xususida hech gap yo'q, faqat Gulnora Karimova turli to'siqlar haqida aytadi.

Qanday to'siqlar? Aynan nima uchun 10 yildan beri ishlab kelgan va ko'pchilik nazarida, respublikada Madaniyat vazirligi o'rnini egallab olgan tizim o'z ishiga xotima yasayapti?

Bu haqda Karimova ham, hukumat ham biror narsa demaydi.

O'tgan bir oy ichida "Fond Forum" prezident qizi yuritgan va ortida turgan boshqa bir qancha tashkilot va kompaniyalar singari elakdan o'tkazildi, moliyaviy hisoblari ko'rib chiqildi va hamon tekshiruvda.

O'nlab kishilar qamoqqa olingan, yuzlab odamlar Milliy xavfsizlik xizmati va boshqa organlar tomonidan so'roq qilingan va qilinmoqda.

Gulnora Karimovaning o'zi bir oy davomida "Twitter" orqali tuzumni unga qarshi urushda aybladi, aybni nafaqat Rustam Inoyatov boshchiligidagi

Milliy xavfsizlik xizmati balki o'z onasi va singlisi hamda ularning atrofidagi odamlarga qo'ydi.

21-noyabr kuni @gulnarakarimova o'chdi. 22-noyabr kuni yana "Twitter"da qayta paydo bo'ldi. Keyin yana o'chdi, bir necha minutdan keyin qayti-da, yana g'oyib bo'ldi. Xullas, bir bor, bir yo'q.

Mashmasha davom etmoqda. "Fond Forum" yopilgani rasman e'lon qilinishi bilan minglab o'zbekistonliklarning ishsiz qolgani aniq.

Tashkilotning Toshkentdagi idorasi u qadar katta emas edi, lekin respublika bo'ylab yuzlab xodimlari, ko'ngilli xizmatchi va faollari bor edi.

Musiqa, kino, hunarmandchilik, moda, ilm-fan va ijtimoiy sohalarni qoplagan loyihalar jamiyat hayotiga o'ziga yarasha ta'sir ko'rsatgan.

Yaqinda "Amerika Ovozi"ga yozilgan maktubda bir o'zbekistonlik shunday yozgan edi:


"... bu tizim O’zbekistonga faqat foyda keltirdi; o’nlab ming ish o’rinlari yaratdi; festival, ko’rgazma, xayriya tadbirlari va marafonlari, media kampaniyalari orqali uni dunyoga tanitdi; mamlakat taraqqiyoti uchun xizmat qildi; hunarmandu mutaxassislarni grantlar bilan rag’batlantirdi; kattayu-kichik, xotin-qizlar va erkaklar ravnaqini ko’zladi; nogironlar va yetimlarga madad ko’rsatdi; shou-biznesni rivojlantirdi; san’atkoru muxlis, hammani o’z tashabbuslariga jalb etdi va turli yo’llar bilan quvvatlab keldi".

Ism-sharifini bildirmasligimizni so’ragan yana bir yosh faol:

“Grant nima? Tanlov nima? Loyiha taklif qilishdan tortib, mablag’ uchun kurashish, natijani taqdim etish, bular katta saboq va ularni aynan “Fond Forum” orqali o’rgandik, katta maktab bu”.

Moskvadan turib "Amerika Ovozi" bilan gaplashgan yana bir o'zbekistonlik esa "Fond Forum" ni tadbirkorlarga nisbatan tinimsiz bosimda ayblaydi.

Masalan, deydi u, “Fond Forum” o'z tadbirlarini bizneslardan shilib olingan mablag’ evaziga uyushtirib kelgan. Xususan “1000 ta to’y” loyihasi, deya hikoya qiladi u, o’zi guvoh bo’lgan voqealarga ishora qilib:

“Tadbirkor kelin-kuyovning kiyim-kechagini tekinga ta’minlashi kerak. To’yxonalar tekinga berilishi kerak. Lekin oxirida buning hammasi Gulnora Karimovaning tashabbusi, ishi deb ko’rsatiladi”.

Gulnora Karimova otasining orqasidan "Gulnora Karimova" bo’ldi, deydi bu fuqaro. Prezidentning qizi bo’lmaganida u shunday nufuzga erisha olarmidi? Shuncha boylik orttira olarmidi?

Aytish joiz, hozirda prezident qizining Yevropa banklaridagi hisoblari muzlatilgan, chunki Shveytsariya, Shvetsiya va Fransiyada tekshiruv ostida. Moliyaviy qalloblik bilan bog'liq jinoyatlar ustida gap ketmoqda.

"Fond Forum" bilan yaqindan ishlagan sobiq rasmiylar, O'zbekiston Madaniyat vazirligida xizmat qilgan shaxslar ham deydiki, har bir tadbir mahalliy hokimiyatlar uchun "og'ir yuk" bo'lgan; turli festival, ko'rgazma, tomosha va ularda qatnashgan mehmonlar, deyarli barcha xarajatlar uchun aksariyat hollarda mahalliy byudjetdan pul ajratilgan; tuman va shahar rahbarlari bu tadbirlardan bezib Toshkentga shikoyatlar bilan chiqqanini aytadi.

"Fond Forum" qatorida O'zbekistonda "Terra Holding" ga kirgan TV-Markaz, Forum-TV, NNT, "Соф TC", "Poytaxt", "A'lo FM" va "Zamin FM" ham yopilgan. Ularda ishlaganlar ham "Fond Forum" va "Kelajak Ovozi" dagilar kabi o'zini aybsiz, fidoiy mehnatkashlar deb biladi.

Ularning ortida turgan Gulnora Karimova bizga "Twitter" orqali ko'p marta eslatganidek, mamlakatda "adolat yo'q".

  • 16x9 Image

    Navbahor Imamova

    Navbahor Imamova - "Amerika Ovozi"ning yetakchi multimedia jurnalisti. "Amerika Manzaralari" turkumidagi teledasturlar muallifi. Ko'rsatuvlar taqdim etish bilan birga prodyuser, muxbir va muharrir. O'zbekistonda akkreditatsiyadan o'tgan yagona amerikalik jurnalist. "Amerika Ovozi"da 2002-yildan beri ishlaydi. Jurnalistik faoliyatini 1996-yilda O'zbekiston radiosining "Xalqaro hayot" redaksiyasida boshlagan. Jahon Tillar Universiteti Xalqaro jurnalistika fakultetida dars bergan. Ommaviy axborot vositalari bo'yicha bakalavrlikni Hindistonning Maysur Universitetidan (University of Mysore), magistrlikni esa AQShning Bol Davlat Universitetidan (Ball State University) olgan. Shuningdek, Garvard Universitetidan (Harvard University) davlat boshqaruvi va liderlik bo'yicha magistrlik diplomiga ega. Jurnalistik va ilmiy materiallari qator xalqaro manbalarda chop etilgan. Amerikaning nufuzli universitetlari va tahlil markazlarida so'zlab, ma'ruzalar o'qib keladi. "Amerika Ovozi" oltin medali sohibi. Toshkent viloyati Bo'stonliq tumani Qo'shqo'rg'on qishlog'ida ziyoli oilasida ulg'aygan.

    Navbahor Imamova is a prominent Uzbek journalist at the Voice of America. As anchor, reporter, multimedia editor and producer, she has covered Central Asia and the U.S. for nearly 20 years on TV, radio and online. For the last year, she has also been reporting from inside Uzbekistan as the first-ever U.S.-based accredited correspondent in the country. During 2016-2017, she was a prestigious Edward S. Mason Fellow in public policy and management, while earning her Mid-Career Masters in Public Administration at Harvard University’s John F. Kennedy School of Government. Imamova played a pivotal role in the launch of Uzbek television programming at VOA in 2003, and has since presented over 800 editions of the flagship weekly show, “Amerika Manzaralari,” which covers American foreign policy focusing on Washington’s relations with Central Asia, as well as life and politics in the U.S. She speaks frequently on regional issues in Central Asia, as well as Uzbek politics and society, for policy, academic, and popular audiences. Her analytical pieces have been published in leading academic and news outlets including Foreign Policy and The National Interest. Imamova also is the founding President of the VOA Women’s Caucus. She began her career at the Uzbek state broadcaster in Tashkent. She holds a Bachelor of Arts in journalism and mass communication from the University of Mysore, India and a Master of Arts in journalism from Ball State University, Indiana.

Izohlarni o'qing (4)

Mazkur forum yopiq.

Shu mavzuda

XS
SM
MD
LG