Qoraqalpog'istonlik jurnalist qariyb 10 yillik qamoqdan so'ng ozod

  • Amerika Ovozi

Solijon Abdurahmonov, 2003-yilda olingan surat

67 yoshli Solijon Abdurahmonov, Qoraqalpog'istondan o'tkir materiallar uzatib tanilgan jurnalist, qariyb 10 yillik tutqunlikdan so'ng bugun ozod etilgan. U Qarshi shahridagi Shayxali qamoqxonasida o'tirgan edi. Abdurahmonov 2008-yilda giyohvand moddalar savdosida ayblanib, 10 yilga qamalgan.

Solijon Abdurahmonov qator axborot vositalariga ishlagan, jumladan "Amerika Ovozi" radiosiga ham. U Qoraqalpog‘istondan turib ishonchli ma'lumot uzatgan, og'ir muammolarni yoritgan sanoqli mustaqil muxbirlardan biri edi.

Jurnalist "Ozodlik" radiosi va Uznews.net nashri bilan ham hamkorlik qilgan.

U 2008-yilning 7-iyunida hibsga olinganida, mashinasidan narkotik moddalar chiqqan, deya iddao qilingan.

Abdurahmonov bu aybni hech qachon bo'yniga olmagan. Uningcha, bu moddalar organlar tomonidan ataylab tashlab qo'yilgan.

Jurnalistning narkotik iste’mol qilmagani tibbiy jihatdan isbotlangan va keyinchalik u narkotik moddalar savdosi bilan shug'ullanganlikda ayblangan.

Solijon Abdurahmonov va "Ezgulik" inson huquqlari jamiyati a'zosi Abdurahmon Tashanov, Qarshi, 4-oktabr, 2017
Solijon Abdurahmonov va "Ezgulik" inson huquqlari jamiyati a'zosi Abdurahmon Tashanov, Qarshi, 4-oktabr, 2017

Kecha yana bir siyosiy mahbus, A'zam Farmonov ozod etilgan edi.

Xalqaro hamjamiyat, jumladan inson huquqlari tashkilotlari va AQSh hukumati bu qarorlarni olqishlab, O'zbekistonda islohotlar jadallashadi va davom etaveradi, degan umidda.

Amerikaning Toshkentdagi elchixonasi kecha bergan bayonotida jumladan shunday deyiladi:

“Bu yangilik Muhammad Bekjonov, Murod Jo‘rayev, Erkin Musayev, Jamshid Karimov va boshqa uzoq muddat qamoqda ushlangan vijdon tutqunlari ozodlikka chiqarilgani ortidan ma’lum bo‘ldi. Biz bunday ijobiy qadamlarni ma’qullaymiz, ular kelgusida boshqa mahbuslarning ozod etilishi va fuqarolik jamiyatiga ochiqroq yondashuv uchun ishora ekaniga umid bildiramiz. Ko‘plab xalqaro inson huquqlari guruhlari A’zam Farmonovning 2006-yili shubhali ayblovlar bilan uzoq muddat ozodlikdan mahrum etilganiga alohida ahamiyat berib keldi. 2013-yili BMT Qiynoqlarga qarshi komissiyasi ham Farmonovni ozod etishga chaqirgan edi. Qo‘shma Shtatlar Prezident Mirziyoyevning Birlashgan Millatlar Tashkilotida ta’kidlagani kabi, O‘zbekistonda inson huquqlarini himoya qilishni mustahkamlashga sodiq ekanini e’tirof etadi. Biz bundan keyin ham keng ko‘lamli siyosiy, ijtimoiy va inson huquqlari borasidagi islohotlarda izchil barqarorlik va taraqqiyot bo‘lishiga umid qilamiz”.

  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

Facebook Forum

XS
SM
MD
LG