Breaking News

YXHT: Saylov Mirziyoyev uchun imtihon edimi - o'tdi yo yiqildi?


Yevropada Xavfsizlik va Hamkorlik Tashkilotining O'zbekistondagi bosh vakili Jon Makgregor "Amerika Ovozi bilan suhbatda, Toshkent, 27-dekabr, 2019

Jon Makgregor (John MacGregor), kanadalik diplomat, 2016-yildan beri O'zbekistonda Yevropada Xavfsizlik va Hamkorlik Tashkiloti (YXHT) vakolatxonasini boshqaradi. Elchi respublikada rahbariyat va siyosat qanday yangilanganini yaqindan kuzatib, Prezident Shavkat Mirziyoyevning islohotlar dasturini quvvatlab kelmoqda. YXHT Demokratik institutlar va inson huquqlari idorasi O'zbekistonda yaqinda o'tgan parlament va mahalliy kengashlarga saylovlarni demokratik yoki adolatli deya baholagani yo'q. Aksincha, mamlakatda tizim va iroda bunday jarayonlarni o'tkazish bobida hali ancha orqada, deya qayd etdi. Makgregor bilan uning Toshkentdagi ofisida suhbatlashdik.

YXHT: Saylov Mirziyoyev uchun imtihon edimi - o'tdi yoki yiqildi?
Iltimos, kuting...

No media source currently available

0:00 0:22:26 0:00


27-dekabr, 2019:

Navbahor Imamova, "Amerika Ovozi": Ertalabdan biz uchun vaqt ajratdingiz, rahmat!

Elchi Jon Makgregor: YXHT idorasiga xush kelibsiz!

Navbahor Imamova, "Amerika Ovozi": Toshkentda tinim yo'q.

Elchi Jon Makgregor: Nimasini aytasiz...

Navbahor Imamova, VOA: Juda bandsiz, ko'rib turibmiz. O'zbekiston saylovni sarhisob qilmoqda.

Elchi Jon Makgregor: Shunday.

Navbahor Imamova, "Amerika Ovozi": 22-dekabrdagi saylovni YXHT missiyasi qanday baholagani ma'lum.

Elchi Jon Makgregor: Ha, baho aniq. Nima xalqaro me'yorlarga mos edi, nima mos emas edi, shuni tahlil qilib berishdi. YXHT kuzatuvchilari o'z ishini biladi. Har bir davlatda bir xil talab ostida baho beriladi.

Navbahor Imamova, "Amerika Ovozi": Qoidalarga binoan.

Elchi Jon Makgregor: Xuddi shunday.

Muammolar talay lekin progress bo'layotgani aniq. Buni inkor eta olmaymiz.

Navbahor Imamova, "Amerika Ovozi": O'zbekistonning bir rasmiysi so'zi bilan aytganda, sinchkov... Siz uch yildan beri Toshkentdasiz.

Elchi Jon Makgregor: Shunday.

Navbahor Imamova, "Amerika Ovozi": Mamlakat boshdan kechirayotgan jarayonlarni yaqindan kuzatib kelayapsiz.

Elchi Jon Makgregor: Albatta.

Navbahor Imamova, "Amerika Ovozi": Siz o'zingiz saylovga qanday baho berdingiz?

Elchi Jon Makgregor: Muammolar talay, lekin progress bo'layotgani aniq. Buni inkor eta olmaymiz. Boshqaruvda va jamiyatda, umuman olganda, katta yutuqlarga erishildi. Ijobiy o'zgarishlarni kuzatish maroqli.

Navbahor Imamova, "Amerika Ovozi": Saylov kampaniyasiga to'xtalsak... Taassurotlar qanday? Siz ish boshlaganingizda O'zbekistonda partiyalar faoliyati deyarli sezilmas edi. Ular ko'rinmas ham edi. Hozir boshqacha. O'z pozitsiyalari bor. Liderlari va albatta tarafdorlari bor.

Elchi Jon Makgregor: Partiya liderlari kim ekanini bildik. Oldinlari oldingizdan chiqib qolmasa, tanimas edik. Ular shaxs sifatida kim ekani, fikr-qarashlarini o'rgandik. Debatlar qizidi, bahslashishdi. Bir-biriga tosh otishdi.

Navbahor Imamova, "Amerika Ovozi": Har biri o'ziga xos shaxs ekanini ko'rdik. Dekabrning boshidan beri O'zbekistondaman. Eng ko'p tanqid qilinganlar shular - partiya liderlari. Biz bilan muloqotlarda ular o'zining zaif jihatlarini yashirmaydi. Siyosatchi emasman, bilimim va tajribam past, deyishadi. O'rganyapmiz, deyishadi. Butun mamlalat dars olayotgandek bu jarayonlarda... Sizga ham shunday tuyuladimi?

Elchi Jon Makgregor: Xuddi shunday.

Navbahor Imamova, "Amerika Ovozi": Mana shu nozik jarayonda YXHT muhim rol o'ynaydi. Bu dars davom etishi, kuchayishi uchun siz nima qila olasiz va qilmoqchisiz?

Elchi Jon Makgregor: Saylov kodeksi ustida qattiq ishladik. Parlament bilan, Markaziy saylov komissiyasi bilan. Tashkilotimizning Demokratik institutlar va inson huquqlari idorasini jalb qildik. Maslahatlashib ish ko'rdik.

Navbahor Imamova, "Amerika Ovozi": O'zbekiston tomon faxrlansa kerak.

Elchi Jon Makgregor: Shunday. Ko'p mehnat qilindi. Tavsiyalarimiz hisobga olindi. Oldingisidan 23 qismi olib tashlandi. Yangicha jarayon uchun zamin bor. Endi uni amalda qo'llash kerak. Partiyalar bilan ishlaymiz.

Navbahor Imamova, "Amerika Ovozi": Treninglar?

Elchi Jon Makgregor: Trening va ta'limdan tashqari boshqalarning tajribasini ko'rish ham juda muhim. G'arbiy Yevropa, Kanada yoki AQSh... Nafaqat yutuqlarga qarab, xatolarga qarab ham o'rganish mumkin. Ular esa talay. Partiya liderlarining roli nima? Demokratik saylov jarayoni qanday tashkil qilinadi? Saylov kuni qanday? Kimdan nima kutiladi? Ularni dunyo tajribasi bilan tanishtirishimiz zarur.

Partiyalar jamiyatning bir qismi, ularning bahs-munozaralari jamiyat ravnaqi uchun xizmat qilishi kerak.

Demokratiyada kuch xalqda. Qanday hukumat xohlaysiz? Siyosiy platformalar nimaga asoslanadi? Liderlar kimlar? Odamlar sizni nimaga qarab tanlaydi? Partiyalar jamiyatning bir qismi, ularning bahs-munozaralari jamiyat ravnaqi uchun xizmat qilishi kerak.

Navbahor Imamova, "Amerika Ovozi": Ozgina bo'lsa ham boshlandimi bu jarayon?

Elchi Jon Makgregor: Ha, shunday. Boshlanyapti.

Navbahor Imamova, "Amerika Ovozi": Odamlar partiyalarga jiddiy qaray boshlagan. Ulardan ko'proq narsa kutishmoqda. Muammolarga yechimlar, yangicha g'oya va takliflar. Bu juda qiyin, uzoq yo'l.

Elchi Jon Makgregor: Partiya liderlari va xalq orasidagi muhim shaxs bu vakil bo'lib, uni qanday tanlash va undan nima kutilishi juda dolzarb masala. Bu inson, nomzod, xalq orasida yurib, o'zini tanishtirishi, odamlarga quloq tutishi lozim.

Navbahor Imamova, "Amerika Ovozi": Mana shu jarayon O'zbekistonda hozir ancha ibtidoiy bosqichda, shundaymi?

Elchi Jon Makgregor: Shunday, ancha ishlash kerak bu borada.

Navbahor Imamova, "Amerika Ovozi": Saylov kampaniyasi va saylov kunidan keyin ko'p quloqqa chalinayotgan narsa bu balki jarayonning ayrim qismlari sahnalashtirilgan degan ishonch. Tizimga nisbatan ishonch past, bu aniq. Hukumat buni saylov paytida ham, undan oldin ham ko'p eshitdi odamlardan. Diplomat sifatida, xalqaro hamjamiyat vakili sifatida, katta davralarda yurgan bir rasmiy sifatida, saylov bilan bog'liq biror holat uyushtirilgan yoki soxta deya olasizmi? Sezdingizmi shunday holatni?

Elchi Jon Makgregor: Ikki omilni unuta olmaymiz.

Navbahor Imamova, "Amerika Ovozi": O'tmishni, oldingi saylovlarni?

Bugun ko'p jihatdan o'tmish mahsuli.

Elchi Jon Makgregor: Ha. Oldinlari shunday bo'lgan va bu safar ham shunday bo'ladi-da, degan ishonch. Bugun ko'p jihatdan o'tmish mahsuli. Bu safar nima o'zgardi degan savolga javob topish qiyin. Boshqa tomondan Markaziy saylov komissiyasiga bosim kuchli. Xato qilmaslik uchun qattiq harakat qilishdi. Hamma narsa risoladagidek bo'lsin deya balki judayam qattiq harakat qilib yuborishdi va nazorat ham shunga yarasha bo'ldi.

Xatolarning oldi olinsin deb juda ko'p odamlar jarayonga bosh suqdi. Markaziy saylov komissiyasidan tashqari boshqa tomonlar ham aralashdi. Vaholanki, butun jarayonni komissiya va uning mahalliy bo'limlari boshqarishi kerak edi.

Navbahor Imamova, "Amerika Ovozi": Va partiyalar.

Elchi Jon Makgregor: Ha, partiyalar. Boshqalarga o'rin yo'q, ayniqsa ijroiya organlariga.

Navbahor Imamova, "Amerika Ovozi": Ma'muriyatga.

Elchi Jon Makgregor: Ma'muriyatga o'rin yo'q. To'g'ri, saylovda qaysi imorat ishlatiladi, jarayon uchun nima zarur... bu masalalarda ularning roli bor. Lekin undan nariga o'tolmaydi. Nazarimda, saylovga aralashishi kerak bo'lmagan tomonlar ko'p aralashdi va shunga harakat qilishdi.

Yevropada Xavfsizlik va Hamkorlik Tashkilotining O'zbekistondagi bosh vakili Jon Makgregor "Amerika Ovozi" bilan suhbatda, Toshkent, 27-dekabr, 2019
Yevropada Xavfsizlik va Hamkorlik Tashkilotining O'zbekistondagi bosh vakili Jon Makgregor "Amerika Ovozi" bilan suhbatda, Toshkent, 27-dekabr, 2019
Nazarimda, saylovga aralashishi kerak bo'lmagan tomonlar ko'p aralashdi va shunga harakat qilishdi.

Navbahor Imamova, "Amerika Ovozi": Bu demokratik test edi. O'zbekistonda islohotlar qay pallada ekanini ko'rsatuvchi imtihon edi. Buni hukumat his qildimi? O'zbekistonda boshqaruv shuni anglay oldimi, nazaringizda? Biz sinovdamiz. Biz nimaga qodir ekanimizni, nimani o'zgartirganimizni ko'rsata olishimiz kerak, deya harakat qilishdimi?

Elchi Jon Makgregor: Qilishdi.

Navbahor Imamova, "Amerika Ovozi": Keyin?

Harakat qilishganiga shubha yo'q. Lekin bu o'tdi yoki yiqildi deya baholanmasligi kerak. Birinchi sinovdan hech kim o'ta olmaydi. Ikkinchi va undan keyingi sinovlar ham qiyin.

Elchi Jon Makgregor: Harakat qilishganiga shubha yo'q. Lekin bu o'tdi yoki yiqildi deya baholanmasligi kerak. Birinchi sinovdan hech kim o'ta olmaydi. Ikkinchi va undan keyingi sinovlar ham qiyin.

Navbahor Imamova, "Amerika Ovozi": Siz shunday qaradingiz, demak?

Elchi Jon Makgregor: Albatta, tajribaga qarab aytayapman.

Navbahor Imamova, "Amerika Ovozi": Parda ortida nima bo'layotganini bilasiz?

Elchi Jon Makgregor: Boshqaruv ogoh turdi. O'zgarish bo'lganini aks ettitirishga harakat qilishdi. Bu jarayon davlat va xalq uchun naqadar muhim ekanini his qilishdi. Hamma qo'ldan kelganicha hissa qo'shdi. Buni biz yaqindan his qildik, ko'rdik.

Navbahor Imamova, "Amerika Ovozi": Prezident Mirziyoyev uchun sinov edimi bu?

Elchi Jon Makgregor: Yo'q, lekin u islohotlar mezoni nimadan iborat ekanini ko'rsatib berdi. Harakatlar dasturi 2017-yildayoq belgilangan edi. U mukammal hujjat va YXHT tamoyillarini ham o'z ichiga oladi. Bizning hissamiz ham bor. Bizning tavsiyalarimiz asosida qabul qilingan. Shunday ekan, biz ham jarayon risoladagidek o'tishini istaymiz. Me'yor va mezonlarga amal qilinishi kerakligini hammamiz bilamiz. Islohotlar amalga oshirilishi kerak.

[Mirziyoyev] islohotlar mezoni nimadan iborat ekanini ko'rsatib berdi.

Navbahor Imamova, "Amerika Ovozi": Demak, buning uchun siz ham mas'ulsiz.

Elchi Jon Makgregor: Xuddi shunday. Shu yerdamiz.

Navbahor Imamova, "Amerika Ovozi": O'z rolingiz bor.

Elchi Jon Makgregor: Ha va buni hamisha his qilamiz.

Yevropada Xavfsizlik va Hamkorlik Tashkilotining O'zbekistondagi idorasi, Toshkent, 27-dekabr, 2019
Yevropada Xavfsizlik va Hamkorlik Tashkilotining O'zbekistondagi idorasi, Toshkent, 27-dekabr, 2019

Navbahor Imamova, "Amerika Ovozi": Bilasizmi, ba'zida xalqaro hamjamiyat Prezident Mirziyoyev va uning islohotlar dasturini shartsiz quvvatlayotgandek tuyuladi. Uni haqiqatdan yaqindan olqishlaysiz. O'zbekiston xalqi va dunyo ahliga respublika to'g'ri yo'lda, deb eslatib kelayapsiz. Nima uchun? Nega bunchalik quvvatlov?

Biz ham jarayon risoladagidek o'tishini istaymiz. Me'yor va mezonlarga amal qilinishi kerakligini hammamiz bilamiz.

Elchi Jon Makgregor: Chunki bu dasturning qanday tuzilganini, Mirziyoyev uni qanday boshqarib kelayotganini bilamiz. Dastur YXHT talablariga javob beradi.

Navbahor Imamova, "Amerika Ovozi": Ya'ni, hukumat siz istagandek harakat qilmoqda?

Elchi Jon Makgregor: 57 a'zo davlatdan 56 tasi buni quvvatlaydi. Bunaqasi boshqa yerda yo'q. Bu nihoyatda muhim. Shu bois uni quvvatlaymiz va tezlikda, bugun va ertagayoq amalga oshirilishini istaymiz.

Navbahor Imamova, "Amerika Ovozi": BMTdan ham shuni eshitayapmiz. Ajablanmay iloj yo'q. O'zbekistonni bunga ko'ndirish qanday kechdi? Ya'ni talablaringizni inobatga oldirish. Chunki, bilasiz, O'zbekistonda hukumat majbriyatlarini tan olmay, ularga amal qilmay kelgan. Endi nima o'zgardi?

Elchi Jon Makgregor: Prezident Mirziyoyev qarori bu. Gaplashdik, fikr almashdik, muloqot qildik. Yangi rahbar ishga tushib, ikki oy o'tar o'tmas islohot dasturi shakllana boshladi. Qaradik, tanishdik, tavsiyalarimizni berdik. Yordamga tayyormiz, dedik. Komandam kuchli, ko'rdingizmi?

Navbahor Imamova, "Amerika Ovozi": Ha, kengayib borayotgan komanda.

Kelganimdan beri biror marta biror cheklov bilan yuzlashmadim.

Elchi Jon Makgregor: Shunaqa. 15 va undan ortiq yildan beri ishlab kelayotganlar bor. Ular masalalarni yaxshi tushunadi. YXHT talab va majburiyatlarini qanday tushuntirishni, targ'ib qilishni, birgalikda loyihalarni amalga oshirishni biladi. Davlat va jamiyat bilan bog'liq murakkabliklarni inobatga olgan holda ishlaydi. Islohotlar amaliyotida bu judayam kerak.

Navbahor Imamova, "Amerika Ovozi": Toshkentdan boshqa joylarga tez-tez chiqib turasizmi?

Elchi Jon Makgregor: Har oy kamida bir marta.

Navbahor Imamova, "Amerika Ovozi": Diplomat sifatida bemalol harakat qila olasizmi? Cheklovlar yo'qmi?

Elchi Jon Makgregor: Kelganimdan beri biror marta biror cheklov bilan yuzlashmadim.

Navbahor Imamova, "Amerika Ovozi": Tashqi ishlar vazirligini sayohat qilayotganingizdan boxabar qilasizmi? Tartib yo'qmi shunday? Oldinlari qo'shimcha cheklovlar ham bo'lgan.

Elchi Jon Makgregor: O'tgan uch yilda hech ko'rmadim. Odatda biror joyga borsam, bu loyihalarimiz bilan bog'liq. Albatta bu proyektlar haqida hukumat biladi. Faoliyatimiz bilan ularni tanishtirib boramiz.

Navbahor Imamova, "Amerika Ovozi": Har bir a'zo davlat uchun alohida dastur sizda, shundaymi?

Elchi Jon Makgregor: Ha.

Yevropada Xavfsizlik va Hamkorlik Tashkilotining O'zbekistondagi bosh vakili Jon Makgregor "Amerika Ovozi" bilan suhbatda, Toshkent, 27-dekabr, 2019
Yevropada Xavfsizlik va Hamkorlik Tashkilotining O'zbekistondagi bosh vakili Jon Makgregor "Amerika Ovozi" bilan suhbatda, Toshkent, 27-dekabr, 2019

Navbahor Imamova, "Amerika Ovozi": O'zbekistondagi hozirgi ustuvor maqsadlar nima? Bittasi, bilamiz, demokratik saylovlarga o'rgatish.

Elchi Jon Makgregor: Shunday.

Navbahor Imamova, "Amerika Ovozi": Bu uzun jarayon, aytganingizdek. Yana nima?

Elchi Jon Makgregor: Korrupsiyaga qarshi kurash.

Navbahor Imamova, "Amerika Ovozi": Chuqur ildiz otgan muammo.

Elchi Jon Makgregor: Azaliy muammo.

Navbahor Imamova, "Amerika Ovozi": Deyarli hamma buni eng muhim muammo, deb ataydi.

Elchi Jon Makgregor: Biz uni muayyan masalalarga bog'lagan holda muhokama qilib, bartaraf etishni taklif qilamiz. Biznes taraqqiyotga, masalan. Korrupsiya bor ekan, mahalliy bizneslar ham rivojlanmaydi, xalqaro bizneslar ham kelmaydi.

Korrupsiya ildiziga bolta urish uchun ko'plab sohalarni yangilash lozim.

Adolat va qonun ustuvorligi bu yerda eng muhim omillar. Prezident Mirziyoyev ham iqtisodiy taraqqiyot shularga bog'liq deb kelmoqda. Demak, adliyani mustahkamlash zarur. Sudyalarni o'qitish, malakasini oshirish, adliya tizimini isloh qilish, bosh prokuraturani isloh qilish, sud mustaqilligini ta'minlash.

Korrupsiya ildiziga bolta urish uchun ko'plab sohalarni yangilash lozim. Biznes va har tomonlama taraqqiyot shuni talab etadi. YXHT bu borada O'zbekiston bilan yaqindan ishlashga bel bog'lagan va ishlayapmiz.

Yevropada Xavfsizlik va Hamkorlik Tashkilotining O'zbekistondagi idorasi, Toshkent, 27-dekabr, 2019
Yevropada Xavfsizlik va Hamkorlik Tashkilotining O'zbekistondagi idorasi, Toshkent, 27-dekabr, 2019
O'zaro ishonchni shakllantirish doimiy ishimiz. O'zbekistonga kelganimdan beri shu bilan bandman.

Navbahor Imamova, "Amerika Ovozi": Xalqaro hamjamiyat, xalqaro tashkilotlarga nisbatan ishonchsizlik keng. Nafaqat O'zbekistonda balki dunyo bo'ylab. YXHT bizga nima qilib beradi? Nima qila olar edi ham, deydiganlar ko'p. O'zbekiston hukumati a'zolari, bu jamiyatni, umuman olganda, qanday ishontirasiz o'z tamoyil va maqsadlaringizga? Sizdan nima kutish kerak va nima kuta olmaymiz?

Elchi Jon Makgregor: O'zaro ishonchni shakllantirish doimiy ishimiz. O'zbekistonga kelganimdan beri shu bilan bandman. O'zbekiston uchun nima qila olamiz, nima qila olmaysiz - shuni tushuntiraman. Maqsadlarimiz aniq va hukumat ularni biladi. Misol uchun, Sog'liqni saqlash vazirligiga mashina kerak bo'lsa, buni biz bera olmaymiz. O'zaro tushuncha bor. Hukumat bilan doimiy aloqadamiz. Loyihalarimiz mohiyatini tushuntiramiz. Ularni tinglaymiz.

Navbahor Imamova, "Amerika Ovozi": Qadriyatlarga e'tibor qaratasiz, shundaymi?

Elchi Jon Makgregor: Shunday. Faoliyatimiz ochiq kitob. Islohotlarni amalga oshirish xalqaro qadriyatlarni hurmat qilishdan boshlanadi.

Navbahor Imamova, "Amerika Ovozi": Birga qadam tashlayapsiz, demak?

Elchi Jon Makgregor: Shunday. Birga ishlash. Ikkinchi jihati esa O'zbekistonni tushunish. Bu davlat, bu xalqning ham o'z talablari bor, o'z xohishlari bor. Biz tashqaridan kelib uni qiling, buni qiling deyish uchun oldin bu jamiyatni o'rganishimiz, uning irodasini anglab yetishimiz kerak. Madaniyat, urf, tarixi, taomlari va tili bor.

Navbahor Imamova, "Amerika Ovozi": O'zbek tilini ancha o'rganib olgansiz, bilamiz.

Elchi Jon Makgregor: Shunday. O'zbekistonni bilmasdan turib, uni o'zgartira olmaysiz.

Navbahor Imamova, "Amerika Ovozi": U bilan bog'lanish kerak, demoqchisiz.

Elchi Jon Makgregor: Albatta, bog'lanishimiz kerak. YXHTning O'zbekistondagi komandasi bunga qodir. Men o'zim ham O'zbekistonni sevaman. Chindan ham mehrim baland.

Navbahor Imamova, "Amerika Ovozi": Kanadadansiz, buning ham ahamiyati bor.

Elchi Jon Makgregor: Kanada ham O'zbekiston singari ko'p elatli davlat. O'zbeklar ham talay. Torontoda ko'p, masalan.

Navbahor Imamova, "Amerika Ovozi": Britaniya Kolumbiyasida ham ko'p.

Elchi Jon Makgregor: Ha, men ham o'sha yerdanman... O'zbekiston va Kanadaning o'xshash jihatlari bor. Aholi soni deyarli teng. Mehmondo'stmiz. Mehnatkashmiz. Katta qo'shnilarimiz bor. Ularning tili va informatsion ta'siri ostidamiz.

O'zbekiston va Kanadaning o'xshash jihatlari bor. Aholi soni deyarli teng. Mehmondo'stmiz. Mehnatkashmiz. Katta qo'shnilarimiz bor. Ularning tili va informatsion ta'siri ostidamiz.

Navbahor Imamova, "Amerika Ovozi": Oldin Qirg'izistonda ishlagansiz. O'zbekistonga qanday moslashdingiz? Dasturlarni bu davlatga qanday to'g'riladingiz?

Elchi Jon Makgregor: O'zbekistondagi bugungi asosiy maqsadlarga qarab belgiladik. Hukumat nima xohlaydi? Xalq nima deydi? Xalqaro tajribaga asoslanib, YXHT hozir bu yerda nima qila oladi? Shularni o'rganib chiqdik. Biz O'zbekiston tajribasini boshqalar bilan baham ko'ramiz. Ya'ni O'zbekiston dunyodan, dunyo bu mamlakatdan o'rganadi. Masalan, mahalla boshqaruvi bobida.

Navbahor Imamova, "Amerika Ovozi": Ko'plab o'zbekistonliklar bu tizimni yoqtirmaydi aslida.

Elchi Jon Makgregor: Ha, hayotimizga aralashadi, deyishadi.

Navbahor Imamova, "Amerika Ovozi": Nazorat mexanizmi, deyishadi. Lekin siz ularga ta'sirli organ deb qaraysizmi?

Elchi Jon Makgregor: Ayrim jihatlarda... Qadim tarixga ega tizim. Kuchi bor o'zining.

Navbahor Imamova, "Amerika Ovozi": Jamoani boshqarish uchun qo'l keladi, demoqchimisiz?

Elchi Jon Makgregor: Jamoa sifatida yashash oson emas. Ayrim davlatlarda bunday narsaning o'zi yo'q.

Navbahor Imamova, "Amerika Ovozi": Venaga, YXHT qarorgohiga tez-tez borib turasiz.

Elchi Jon Makgregor: Ha.

Navbahor Imamova, "Amerika Ovozi": Bugungi O'zbekistonni qanday tasvirlab berasiz u yerda?

Elchi Jon Makgregor: Harakatchan davlat, deyman. Muammolar talay. Islohotlarning uchinchi yili boshlanmoqda. Oldinda ish ko'p.

Navbahor Imamova, "Amerika Ovozi": Majburiyatlarga kelganda, Prezident Mirziyoyev shaxsan javobgar deb bilasizmi?

Elchi Jon Makgregor: YXHTning har bir a'zosi boshqa har bir a'zo oldida javobgar. Tartib shunday. Venada har hafta muhokama. Majburiyatlarga qay darajada rioya qilayapsiz, deb so'rashadi.

YXHTning har bir a'zosi boshqa har bir a'zo oldida javobgar. Tartib shunday. Venada har hafta muhokama. Majburiyatlarga qay darajada rioya qilayapsiz, deb so'rashadi.

Navbahor Imamova, "Amerika Ovozi": Lekin O'zbekiston bunga o'rganmagan. Yaqingacha ham bosh tortib kelar edi. Endi diplomatlar bu borada boshqacha gapirishadi. Xalqaro majburiyatlarga bosh egamiz, deyishadi. Qanchalik samimiy?

Elchi Jon Makgregor: Orada muloqot ketmoqda. Yangilik shu. 3-4 yil oldin hech qanday muloqot yo'q edi. Yo'q, bu borada gaplashmaymiz, deyishar edi. 2016-yilning dekabridagi prezident saylovi ketidan muloqot shakllana boshladi. Hozir hamma narsa muhokamada. Mana shu dialogni kuchaytirayapmiz va amaliy ishlar qilish harakatidamiz. Samimiy harakat bu.

Navbahor Imamova, "Amerika Ovozi": Oldingidan farqi shu, demak? Suhbat uchun rahmat!

Elchi Jon Makgregor: Sizga rahmat vaqt topganingiz uchun.

Navbahor Imamova, "Amerika Ovozi": Toshkentda siz va boshqa diplomatlar bilan gaplashish maroqli.

Elchi Jon Makgregor: Biz uchun ham siz bilan gaplashish maroqli. Katta rahmat.

  • 16x9 Image

    Navbahor Imamova

    Navbahor Imamova - "Amerika Ovozi"ning yetakchi multimedia jurnalisti. "Amerika Manzaralari" turkumidagi teledasturlar muallifi. Ko'rsatuvlar taqdim etish bilan birga prodyuser, muxbir va muharrir. O'zbekistonda akkreditatsiyadan o'tgan yagona amerikalik jurnalist. "Amerika Ovozi"da 2002-yildan beri ishlaydi. Jurnalistik faoliyatini 1996-yilda O'zbekiston radiosining "Xalqaro hayot" redaksiyasida boshlagan. Jahon Tillar Universiteti Xalqaro jurnalistika fakultetida dars bergan. Ommaviy axborot vositalari bo'yicha bakalavrlikni Hindistonning Maysur Universitetidan (University of Mysore), magistrlikni esa AQShning Bol Davlat Universitetidan (Ball State University) olgan. Shuningdek, Garvard Universitetidan (Harvard University) davlat boshqaruvi va liderlik bo'yicha magistrlik diplomiga ega. Jurnalistik va ilmiy materiallari qator xalqaro manbalarda chop etilgan. Amerikaning nufuzli universitetlari va tahlil markazlarida so'zlab, ma'ruzalar o'qib keladi. "Amerika Ovozi" oltin medali sohibi. Toshkent viloyati Bo'stonliq tumani Qo'shqo'rg'on qishlog'ida ziyoli oilasida ulg'aygan.

    Navbahor Imamova is a prominent Uzbek journalist at the Voice of America. As anchor, reporter, multimedia editor and producer, she has covered Central Asia and the U.S. for nearly 20 years on TV, radio and online. For the last year, she has also been reporting from inside Uzbekistan as the first-ever U.S.-based accredited correspondent in the country. During 2016-2017, she was a prestigious Edward S. Mason Fellow in public policy and management, while earning her Mid-Career Masters in Public Administration at Harvard University’s John F. Kennedy School of Government. Imamova played a pivotal role in the launch of Uzbek television programming at VOA in 2003, and has since presented over 800 editions of the flagship weekly show, “Amerika Manzaralari,” which covers American foreign policy focusing on Washington’s relations with Central Asia, as well as life and politics in the U.S. She speaks frequently on regional issues in Central Asia, as well as Uzbek politics and society, for policy, academic, and popular audiences. Her analytical pieces have been published in leading academic and news outlets including Foreign Policy, The National Interest, and The Atlantic. Imamova also is the founding President of the VOA Women’s Caucus. She began her career at the Uzbek state broadcaster in Tashkent. She holds a Bachelor of Arts in journalism and mass communication from the University of Mysore, India and a Master of Arts in journalism from Ball State University, Indiana.

Facebook Forum

Shu mavzuda

XS
SM
MD
LG