Breaking News

O'zbekiston vazirlari AQShda siyosiy va biznes doiralar bilan muloqotda


O'zbekiston Tashqi ishlar vaziri Abdulaziz Komilov Oq uyda Prezident Trampning Milliy xavfsizlik masalalari bo'yicha maslahatchisi Jon Bolton bilan, 17-iyul, 2019
O'zbekiston Tashqi ishlar vaziri Abdulaziz Komilov Oq uyda Prezident Trampning Milliy xavfsizlik masalalari bo'yicha maslahatchisi Jon Bolton bilan, 17-iyul, 2019

O'zbekiston Tashqi ishlar vaziri Abdulaziz Komilov, Adliya vaziri Ruslanbek Davletov va Kapital bozorlarini rivojlantirish agentligi rahbari Otabek Nazirov, shuningdek, yetakchi senator Sodiq Safoyev bu hafta AQShda. Maqsad - Vashington va Nyu-Yorkda muzokaralar o'tkazib, bu davlat bilan hamkorlikni oshirish, xususan inson huquqlari va islohotlar, iqtisodiy va moliyaviy masalalarda Amerikadan ko'proq yordam va xayrixohlik olish.

Vashingtonda 18-iyul kuni Diniy erkinlik bo'yicha xalqaro anjuman o'tmoqda. O'zbekiston ham yuzlab davlatlar qatorida o'z vakillarini yuborgan. Tadbir asosan tashqi ishlar va adliya vazirlari darajasida o'tadi.

AQSh e’tiqod erkinligiga asoslangan tuzumdir, deydi Mayk Pompeo, davlat kotibi. Huquq va adolat - bu mamlakat ustuni. Diniy erkinlik - nasroniy, yahudiy, musulmon yoki buddist erkinligi bilan cheklanmaydi, dedi u. Diniy erkinlik - umumbashariy, umuminsoniy erkinlik.

Vitse-prezident Mayk Pens deydiki, Amerika diniy jihatdan ezilgan odamlarni himoya qiladi. Maqsad tinchlik va ezgulik bo’lsa, deydi Pens, AQSh siz tomonda.

Nyu-York, 16-iyul, 2019
Nyu-York, 16-iyul, 2019

Nyu-York, 16-iyul, 2019
Nyu-York, 16-iyul, 2019

O'zbekiston delegatsiyasi Nyu-Yorkda nufuzli Kolumbiya universitetida bo'lib, bu dargoh bilan ilmiy-amaliy sheriklikni yo'lga qo'yish hamda dunyo moliya bozori joylashgan shaharda o'z sheriklariga ega bo'lishni ta'minlash haqida kelishib olgan.

Vashingtonda Jahon bankida ham uchrashuvlar kechgan. Unda O'zbekistondagi moliyaviy ahvol va kapital bozori shakllanishi uchun qilinayotgan ishlar haqida gap ketgan.

Jahon banki, Vashington, 17-iyul, 2019
Jahon banki, Vashington, 17-iyul, 2019

Toshkentdan kelgan rasmiylar AQSh Moliya vazirligiga ham tashrif buyurgan. Texnik ko'mak olish, ya'ni O'zbekistonda endi oyoqqa turayotgan kapital bozoriga funksional yordam berish borasida gaplashilgan.

Tashqi ishlar vaziri Komilov Oq uyda Prezident Trampning Milliy xavfsizlik masalalari bo'yicha maslahatchisi Jon Bolton bilan muloqot qilgan. Vashington O'zbekistondagi islohotlarni quvvatlab keladi va uning nazarida bu jarayonlar butun Markaziy Osiyoga ijobiy ta'sir o'tkazmoqda.

Kelishuv va memorandumlar olamshumul yangilik emas. Amerika siyosiy, biznes va ilmiy doiralarida savollar ko'p. Asosiylari, jumladan: Islohotlar bugungacha nimani yangiladi? Konkret natijalar nimalardan iborat? O'zbekiston bugun qanchalik erkin? Qonun, adolat qanchalik ustuvor? O'zbekistonda korrupsiyaga qarshi kurash qanday kechmoqda? Toshkentga ishonish uchun qanday asoslar bor?

AQSh Moliya vazirligida, 17-iyul, 2019
AQSh Moliya vazirligida, 17-iyul, 2019

O'zbekistonning Vashingtondagi elchixonasida delegatsiya bilan katta davra suhbati bo'lib o'tdi. Unda mamlakatdagi bugungi vaziyat, tashqi siyosatdagi ustuvor maqsadlar, shuningdek, adliya va inson huquqlari bobidagi o'zgarishlar va muammolar hamda kapital bozori va iqtisodiy muhit muhokama qilindi.

Komilov deydiki, bugungi O'zbekiston barcha muammolarni o'rganib, yechimlar ustida ishlashga moyil.

"AQSh biz uchun hamisha ishonchli sherik bo'lib kelgan va hozirgi tashrifimiz ham mana shu ishonch namunasi, chunki biz Amerika bilan serqirra va sermahsul hamkorlik istaymiz", - deydi O'zbekiston tashqi ishlar vaziri.

Oq uy rasmiysi, Prezident Trampning mintaqa bo'yicha maslahatchisi Liza Kurtis fikricha, Prezident Mirziyoyev kuchli diplomatlarga ega va tashqi siyosat ustida ishlayotgan komanda salohiyati bilan boshqalardan ajralib turadi.

"O'zbekistonga biz ulkan umid bilan qaraymiz. O'zgarishlarni kuzatib, tahlil qilib kelayapmiz. Muammolar talay lekin yutuqlarni ham tan olib, O'zbekiston hukumatini qilayotgan sa'y-harakatlari yuzasidan quvvatlashda davom etamiz... O'zbekiston yangilanmoqda, yangicha tuzum va jamiyatga aylanishga urinmoqda... Bu oson emas, lekin harakatda ekani bizni xursand qiladi", - deydi Kurtis.

Davlat departamentida Janubiy va Markaziy Osiyo bo'yicha bosh rasmiy Elis Uells ham O'zbekiston elchixonasidagi tadbirda so'zlar ekan, Komilovga ikki davlatni yaqinlashtirish borasida qilayotgan xizmatlari uchun minnatdorchilik bildirdi.

"Strategik sheriklik muntazam muloqot va fikr almashinuv talab qiladi. Bu jarayon O'zbekiston bilan silliq va ishonchli", - deydi Uells.

"Afg'onistonda tinchlikka erishish masalasidan tortib, O'zbekistondagi islohotlar ko'lami va uninq mashaqqatli jihatlarigacha, Toshkent bilan muloqotimizdan ko'nglimiz to'q," - deydi diplomat.

Vashington rasmiylari har safar O'zbekiston tomon bilan uchrashuvlar paytida yoki ulardan keyin bir narsani eslatadi: AQSh respublikada islohotlar ketayotganiga ishonadi. O'zgarishlar qanchalik sust yoki jadal bo'lmasin, muammolarni hal etish murakkab qadamlar talab qilishini biladi. O'zbekistonga yordam kerak. AQSh tayanch bo'lishga bel bog'lagan.

Senator Sodiq Safoyev tahlilicha, tomonlar bir-biridan o'rgangan holda qadam tashlamoqda, ya'ni bir-birini chuqurroq tushunadi. O'zbekiston o'zgarayotganini namoyon etgani sari Amerika ham unga ko'proq ishonch bilan qaramoqda. Xalqaro masalalarda hamkorlik, Markaziy Osiyo birdamligi va tinchligi, ikki tomonlama aloqalar - O'zbekiston va AQSh yakdil, deydi Safoyev.

O'zbekistonda yil oxirida parlament saylovlari. Bu saylovlar qanchalik shaffof va adolatli o'tishi respublikaning bugungi maqomini belgilab beradi. Safoyev deydiki, O'zbekiston dunyo ko'zi unda ekanini biladi. E'tibor jiddiy va davlat buni suiiste'mol qilmaydi.

BMT va Yevropada Xavfsizlik va Hamkorlik Tashkilotining tegishli organlari O'zbekistonda saylovlar milliy va xalqaro qonunlarga mos ravishda o'tishini ta'minlash uchun harakat boshlab, yordam ko'rsatadi. Taklifnomalar allaqachon yuborilgan va tayyorgarlik boshlangan.

Xalqaro tashkilotlar O'zbekistonda ro'yxatdan o'tish borasida hamon katta qiyinchiliklar borligini qayd etib keladi, xususan inson huquqlari bo'yicha "Human Rights Watch" tashkiloti. U singari boshqa muassasalarning bir paytlar Oliy sud yoki boshqa sudlar hukmi bilan faoliyati tugatilgan. Ular mamlakatga qayta kirishi uchun sudlarga murojaat qilishi kerak, agar sudlar arzlarni eshitishga tayyor bo'lsa. Aks holda O'zbekistonda idora ocha olmaydi. Faqat vaqt-vaqti bilan kelib, vaziyatni o'rganib, dasturlar yuritishi mumkin xolos.

O'zbekiston Adliya vaziri Ruslanbek Davletovning "Amerika Ovozi" ga tushuntirishicha, jarayonni osonlashtirish yo'llari ustida harakat ketmoqda. Respublikaga kiraman degan tashkilotlar ko'p va mamlakat eshiklari ochiq, deydi vazir, lekin yuridik chigalliklar har bir tashkilot uchun alohida ko'rib chiqib, qaror qilinadi.

"Hamma uchun birdaniga javob bera olmaymiz va har bir arizani darrov ko'rib chiqib, muammolarni hal eta olmaymiz", - deydi Davletov.

"Lekin O'zbekiston bu tashkilotlar uchun ataylab to'siq qo'yayotgani yo'q. Biz ular bilan ishlashni xohlaymiz. Ochiqmiz. Muloqotdamiz. Vakillar kelib O'zbekistondagi bugungi vaziyat bilan tanishib, imkoniyatlarni o'rganib ketmoqda. HRW eksperti Stiv Sverdlov ham tez-tez kelib turibdi. O'zbekistonga viza bilan kelib ishlab ketish imkoniyatiga ega," - deydi adliya vaziri.

Vashington, 18-iyul, 2019: O'zbekiston Adliya vaziri Ruslanbek Davletov, Kapital bozorlarini rivojlantirish agentligi rahbari Otabek Nazirov va amerikalik yurist Tomas Fayerstoun
Vashington, 18-iyul, 2019: O'zbekiston Adliya vaziri Ruslanbek Davletov, Kapital bozorlarini rivojlantirish agentligi rahbari Otabek Nazirov va amerikalik yurist Tomas Fayerstoun

Kapital bozorlarini rivojlantirishdek murakkab vazifaga zamon sinovi deb qarayotgan Otabek Nazirov ham "Amerika Ovozi" bilan gaplashar ekan, yangi bozor uchun mamlakatda tabiiy sharoit bor, deydi. Uningcha, moliyaviy mexanizmlar ishga tushgani sari u kengayib boraveradi.

"Bank tizimi rivojlanmoqda. Xususiy sektor kengaymoqda. O'zbekistonda bugun qudratli sarmoyadorlar va tadbirkorlar bor. Moliya sistemamiz yanada zamonaviylashar ekan, kapital bozorida ham imkoniyatlar oshadi", - deydi Nazirov, Kapital bozorlarini rivojlantirish agentligi rahbari.

Uning agentligi biror vazirlikka qaramaydi, mustaqil. Respublika bo'ylab 13 vakolatxona va 100 dan ortiq xodimi bor.

Nazirov deydiki, O'zbekistonda kapital bozori Amerika modeli bo'yicha rivojlanishi kerak. Uning o'zi amerikalik-o'zbekistonlik. O'zbekistonda tug'ilgan, Amerikada voyaga yetgan. Turli mamlakatlarda ishlab, tajriba orttirgan. Ikkinchi yildirki, O'zbekiston hukumatida faoliyat yuritmoqda.

Mamlakat o'z kapital bozori bilan maqtanishiga hali ancha bor. Nazirov ta'biricha, 5-6 yil kerak.

"Hozir strategiya va tizim ustida qattiq ishlayapmiz", - deydi u.

Bu tashrif mobaynida Nyu-Yorkning Kolumbiya universiteti bilan amaliy hamkorlik qilish, uning ekspertlaridan foydalanish, O'zbekistonda mutaxassislarni treningdan o'tkazish, shuningdek, AQSh Moliya vazirligi, kapital bozori bilan bog'liq tashkilotlar, Jahon banki, Xalqaro Valyuta Jamg'armasidan texnik ko'mak olish hamda hamkorlik qilish bo'yicha kelishuvlarga erishilgan.

Amerika biznes doiralariga O'zbekistondagi sharoit va imkoniyatlar haqida aytib berayotgan delegatsiya G'arb ishbilarmonlarini mamlakatga juda bo'lmaganda sayyoh sifatida borishga taklif qilmoqda.

Senator Safoyev bilan suhbat: AQSh-O'zbekiston va Oliy Majlis kelajagi
Iltimos, kuting...

No media source currently available

0:00 0:16:40 0:00

  • 16x9 Image

    Navbahor Imamova

    Navbahor Imamova - "Amerika Ovozi" teleradiosining yetakchi multimedia jurnalisti. "Amerika Manzaralari" turkumidagi teledasturlar muallifi. Ko'rsatuvlar taqdim etish bilan birga prodyuser, muxbir va muharrir. O'zbekistonda akkreditatsiyadan o'tgan yagona amerikalik jurnalist. "Amerika Ovozi"da 2002-yildan beri ishlaydi. Jurnalistik faoliyatini 1996-yilda O'zbekiston radiosining "Xalqaro hayot" redaksiyasida boshlagan. Jahon Tillar Universiteti Xalqaro jurnalistika fakultetida dars bergan. Ommaviy axborot vositalari bo'yicha bakalavrlikni Hindistonning Maysur Universitetidan (University of Mysore), magistrlikni esa AQShning Bol Davlat Universitetidan (Ball State University) olgan. Shuningdek, Garvard Universitetidan (Harvard University) davlat boshqaruvi va liderlik bo'yicha magistrlik diplomiga ega. Jurnalistik va ilmiy materiallari qator xalqaro manbalarda chop etilgan. Amerikaning nufuzli universitetlari va tahlil markazlarida so'zlab, ma'ruzalar o'qib keladi. "Amerika Ovozi" oltin medali sohibi. Tashkilotda gender va jurnalistika bo'yicha kengash raisi. Toshkent viloyati Bo'stonliq tumani Qo'shqo'rg'on qishlog'ida ziyoli oilasida ulg'aygan.

    Navbahor Imamova is a prominent Uzbek journalist at the Voice of America. As anchor, reporter, multimedia editor and producer, she has covered Central Asia and the U.S. for more than 20 years on TV, radio and online. Since 2018, she has also been reporting from inside Uzbekistan as the first-ever U.S.-based accredited correspondent in the country. During 2016-2017, she was a prestigious Edward S. Mason Fellow in public policy and management, while earning her Mid-Career Master in Public Administration at Harvard University’s John F. Kennedy School of Government. Navbahor played a pivotal role in the launch of Uzbek television programming at VOA in 2003, and has since presented more than 1000 editions of the flagship weekly show, “Amerika Manzaralari” (Exploring America), which covers American foreign policy focusing on Washington’s relations with Central Asia, as well as life and politics in the U.S. She speaks frequently on regional issues in Central Asia, as well as Uzbek politics and society, for policy, academic, and popular audiences. Her analytical pieces have been published in leading academic and news outlets including Foreign Policy, The National Interest, and the Atlantic. Navbahor also is the founding President of the VOA Women’s Caucus. She began her career at Uzbekistan’s state broadcasting company in Tashkent. She holds a Bachelor of Arts in journalism and mass communication from the University of Mysore, India and a Master of Arts in journalism from Ball State University, Indiana.

Facebook Forum

Shu mavzuda

XS
SM
MD
LG