Toshkent viloyati Bo'stonliq tumani Qo'shqo'rg'on qishlog'i poytaxtdan bir soatlik yo'l. Lekin qoloqlikda olis hududlardan qolishmaydi. Yo'llar va infrastruktura nihoyatda eski. Maktab binolaridan birini hatto rasmiylarning o'zi "bomba tushganga o'xshaydi", deya ta'riflaydi. Prezident saylovi oldidan "Amerika Ovozi" O'zbekistonning bu qismida qariyb 10 ming aholi qanday dardlar bilan yashayotganini o'rgandi. Prezidentlikka nomzodlar, xususan qayta saylanishga bel bog'lagan Shavkat Mirziyoyevning bevosita e'tiborini kutayotgan qishloq fuqarolari deydiki, mahalliy rahbarlardan naf yo'q.