Breaking News

Jill Bayden amerikaliklardan umr yo'ldoshiga ovoz berishni so'ramoqda


Jill Bayden o'qituvchi, turmush o'rtog'i vitse-prezidentlik qilgan paytda ham ishidan to'xtamagan
Jill Bayden o'qituvchi, turmush o'rtog'i vitse-prezidentlik qilgan paytda ham ishidan to'xtamagan

AQShda Demokratik partiyaning saylovoldi qurultoyi davom etarkan, prezidentlikka nomzod Jo Baydenning 43 yillik turmush o'rtog'i Jill Bayden partiya a'zolari va butun Amerika xalqiga murojaat qilib, unga ovoz berishni so'radi. "Oq uy uchun undan-da munosib kishi yo'q", - dedi Bayden xonim 18-avgust oqshom qilgan ma'ruzasida.

Jill Baydenning nutqi Delaver shtatidagi maktabdan havola etildi. Ilm maskanlari pandemiya sabab huvillab qolgani, yosh avlod uydan o'qiyotganiga urg'u berar ekan, Bayden xonim, koronavirusni yengish uchun Oq uyda jasorat, mehr, iroda va malaka yetishmayapti, dedi.

Bu kuni, shuningdek, boshqa mashhur demokratlar, xususan sobiq prezidentlar Bill Klinton va Jimmi Karter, sobiq davlat kotibi va senator hamda prezidentlikka nomzod Jon Kerri, sobiq davlat kotibi va respublikachi Kolin Pauel, marhum respublikachi senator Jon Makkeynning rafiqasi Sindi Makkeyn va Kongressdagi yosh qonunchilar so'zladi.

Ularning hammasi bir fikrda yakdil: Prezident Donald Tramp qayta saylanmasligi lozim. Respublikachilarning kelgusi haftada o'tadigan qurultoyida esa buning aksi yangrashi kutilmoqda, ya'ni Tramp albatta qayta saylanishi kerak va bu partiya nazarida Oq uy uchun undan-da loyiq odam yo'q, degan chaqiriqlar.


Jill Bayden vitse-prezidentlik uchun ayol kishi, qora tanli va hind muhojirlar farzandi Kamala Harris tanlanishida muhim rol o'ynagan.

19-avgust kuni Harris so'zlaydi, qurultoy yakunida esa, 20-avgust kuni, Baydenning o'zi saylovchilarga murojaat qiladi.

Koronavirus pandemiyasi bois tadbir virtual tarzda o'tmoqda. Markaz sifatida Miluoki shahri tanlangan. Studiya va tashkiliy guruh bu shahardan turib, onlayn nutqlarni havola etmoqda. Millionlab amerikaliklar qurultoyni TV va internetda tomosha qilmoqda.

Sobiq prezident Barak Obamaning rafiqasi Mishel Obama qurultoyning birinchi kunida so'zlar ekan, amerikaliklarni befarq bo'lmaslikka undadi.

“Donald Tramp mamlakatimiz uchun noloyiq prezident. Unga ishni eplash uchun keragidan ortiq vaqt berildi, biroq uddasidan chiqa olmadi", - dedi Obama xonim.

“Oq uy davlatni boshqarish emas, mashmasha bilan band. Tarqoqlik, xalq dardini tushunmaslik kabi illatlar hukmron. Tramp talabimizga javob bermaydi va bunga qodir emas".

Prezident Donald Tramp Arizona shtatida tarafdorlari oldida, 18-avgust, 2020
Prezident Donald Tramp Arizona shtatida tarafdorlari oldida, 18-avgust, 2020

Prezident Tramp bu tanqidga javoban tvit qilib, Mishel Obamaga kesatiq minnatdorchilik bildirdi.

Obama xonim nutqni bir necha kun oldin yozgani, koronavirusdan o'lganlar soni u aytganidek 150 ming emas, hozirda 170 mingdan oshgani, Tramp fikricha, notiqqa nisbatan ishonchni pasaytiradi.

"Obama rahbariyati tarixdagi eng korrupsiyalashgan, hatto mening saylov kampaniyamni zimdan kuzatib, mamlakatimizni eng katta siyosiy mashmashaga yetaklagan prezidentlik edi. Ular bizni sotishgan...", - deya tvit qidi Prezident Tramp.

Unga ko'ra, Amerikada saylovchilar Obamadan keyin uningdek odamni prezidentlikka tanlagani Mishel Obamaning umr yo'ldoshi o'z ishini eplay olmaganini anglatadi. Tramp nazarida, shuningdek, Obama Baydenni quvvatlashga shoshmagan. Obamaning o'zi ham qurultoyda so'zlashi kutilmoqda.

Demokratlar yig'ini paytida prezident Arizona va Pensilvaniya shtatlarida tarafdorlari bilan uchrashmoqda.

Klinton o'z nutqida deydiki, Tramp AQSh liderlik qilmoqda deya qanchalik maqtanmasin, pandemiya davrida ishsizlik uch baravar ortdi.

"Bunday ko'rsatkich boshqa biror rivojlangan davlatda kuzatilmadi", - deydi Klinton.

"Oq uy hozirgi inqirozdan chiqish jon-jahdi bilan harakat qilish o'rniga, siyosiy mashmashalar ichida, faqat xaos", - deya tasvirladi Klinton.

Pauel fikricha esa Amerikaga mudofaa va xavfsizlik masalalarini chuqur tushunadigan lider kerak. Qurolli kuchlarga o'z oilasi kabi qarab, g'amxo'rlik qila oladigan rahbar, deydi iste'fodagi general.

"Jo Bayden bu borada saboqqa muhtoj emas", - deydi Pauel, amerikaliklarni uni quvvatlashga undar ekan.

Kerri ham Trampni qoralab, Baydenni shubhasiz hozirgi AQSh va dunyoga zarur lider sifatida tasvirladi. 2004-yilda Oq uy uchun kurashni boy bergan Kerri amaldagi prezidentni AQShning global nufuziga misli ko'rilmagan darajada zarar keltirganlikda, davlatning uzoq yillik ittifoqchilari bilan orani buzganlikda, dushman va do'stni bir-biridan ajrata olmaganlikda, hamkorlarni uzoqlashtirib, g'animlarni yaqinlashtirib, tashqi siyosat va savdoni eplay olmayotganlikda, xalqaro masalalarga yechimlar taklif qilmay, Amerikani passivlashtirganlikda tanqid qildi.


77 yoshli Bayden ommaviy so'rovlarda 74 yoshli Trampdan oldinda, biroq o'tgan 40 yilda AQShda faqat bir marta prezident qayta saylana olmagan xolos. Bu safar Amerika amaldagi rahbardan voz kechib, yangi bir odamni saylay oladimi? 3-noyabrdan keyin ma'lum bo'ladi.

Tahlilchilar deydiki, Bayden avvalo yosh avlodni, shu paytgacha saylov va ovoz berishga jiddiy qaramagan amerikaliklarni o'ziga qarata olishi va faollashishga ishontirishi lozim.

Qurultoyda, deydi siyosatdonlar, notiqlar oq tanli yoki keksa yoshdagi siyosatchilar emas, Amerika jamiyatini yaqqol aks ettiruvchi vakillar bo'lishi lozim. Keksalar qatori yoshlar ham minbarga chiqishi kerak.

  • 16x9 Image

    Amerika Ovozi

    "Amerika Ovozi" - Vashingtonda asoslangan xalqaro teleradio, 45 tilda efirga chiqadi. O'zbek tilidagi ko'rsatuv va eshittirishlarda nafaqat xalqaro hayot balki siz yashayotgan jamiyatdagi muhim o'zgarishlar va masalalar yoritiladi. O'zbek xizmati AQSh poytaxtida olti kishilik tahririyatga va Markaziy Osiyo bo'ylab jamoatchi muxbirlarga ega.

Facebook Forum

Shu mavzuda

XS
SM
MD
LG